Page 3 - 文蚌2025年第4期

《WUNPONG》NUMHTET GA

Laika ngau go gram shapro ai re nga, laika ka sara ni nong e
tsun ai hte maren, 《Wunpong》hkumhpa laika gram lajang hpung
de shalai dat ai laika ngau lo lo go, laika ka masha ni a laika ka
shalat myit atsam sharot ya, laika ka myit hpunggun ndo mat,
shing nrai hkatum mi atum rai ka shalat ai laika ngau hpe n lahpot
kau na matu, galang hte galang gram sharai jat shangun rai ga ai,
rai yang, laika ka shalat masha nkau kau go ten garot ton, n kam
gram mat, gram lajang hpung na sara ni matsun ai lachyum hku
n chye gram, gram magang n jo magang rai mat ai laika ngau mung
nga nga ai, gram lajang hpung na sara ni hkrai gram sharai ya ai
lo mat wa jang, laika ka shalat masha ni a laika ka hpaji madang
n tso hkro ai hta n-ga, lachyum sung sung n myit shakru yu ai,
ntsa lam majoi mi ka ahkyot shalai dat dat rai nga ai, shingrai
yang, anhte a《Wunpong》hkumhpa laika a hparat madang rot jat
wa na hta wa-hkye hkra chyalu sha re, dai majo, tsora hkungga ai
laika ka shalat sara ni yong hpe ka ngut ai laika ngau hpe loi ya
mi shayup ton ai hpang, bai nhtang hti gram sharai n lagon rai ga
ngu hpyi nyem dat ga ai.
2025 ning lado 4 na sumrai gadun《Gumhpro lupba》go sara
ma Hpan Ja ka shalat ngut ai hpang, sumrai gata na masha madung
ni a myit jasat ronlai ni tarong tara hte nhtuk ai shara nga ai majo,
magum bu sai nta hpe run kau nna galang bai go gap ai hpa, laika
ngau gata na masha ni a nga lu nga sa, shamu shamot, lailen, ga
shaga manong ni yong hpe gram galai sharai u ai. Laika ngau ndai
go shabung maumui hte gapyon ai sha nrai, ginra masha ni hkai
tsun nga ai maumui ko hpa-ra let, ya yang na hpong shingra hta
galo lu galo sha mabyin lam ni hpe gumhpon rai, laika ka sara ma
myit shakru bungjat la nna ka shalat ai laika ngau re. Laika ka
shalat kasi kanan la mai ai, yong hti n-gun jo la ga!
《Malap nlu ai》laika ngau go sara Lahto Brang Ja ka shalat ai
kum yai re, madu a dum nta masha ni hpe myit shai let ka ai laika
ngau re majo, dai prat na shingran hpe pra pra mu lom ai. Laika
nnan ka sharin yang, madu chye ai mu, galo yu ai lam, nta masha ni
hpe ka yang, ka manu ai, shingni rong ai, hti masha ni hkam mu hti
ai shaloi rai tim, madu a hkum hkrum re zon nga nga ai.
Moi ninghkong jaiwa gaba Wa Ma dingla, mangai ten lado
na lam hte gapyon nna jahtap jahtuk shalat da ai ga shagop
《Mangai lado》ndai go, ya yang na ga shagop ka hkrang a ningpot
ninghpang re nga tsun gajai ai majo, sara Htoi Man ka sumhting
da ai ko na hpyi htot ka bang da ai re, yong hkap hti yu ga.
Ndum ai shaning bai htum mat wa sai. Jinghpo Wunpong myu
sha ni yong sali wunli lu ai hte nga mu nga mai ai ten《Wunpong》
hkumhpa laika hpe n malap kau ai sha hti n-gun jo la let, laika
ngau dingyang ka shalat shagun na hpe ala nga ga ai.

《Wunpong》gram lajang hpung
2025.12.30