Sabyin si gaba go kya nna dui mu la ai majo, masha lo lo grau nna go gumgai dingla ni grai ra sharong nna, galang ta lahkong masum sha kau ai pyi nga nga ma ai. Ya yang go sabyin si gaba sha ai lado nan rai nga ai, tsi rung ko sabyin si gaba sha nna kan machyi, kan chyabung grau nna go shat rin lam sai pru ai ana masha ni hpe grai hkap tsi lajang nga ai. Ana manghkang ndai ni a npot nhpang go shat kan nlung rai nga ai.

Sabyin si gaba, makok si, mahko si chyang ni yong go shat kan nlung shabyin shatai dat wa chye nga ai.

Sha hpa nkau mi sha ai hpang, shat kan gata hta ja ja nga ai atong rong wa ai rai yang, dai go shat kan nlung rai sai. Gaji ai shat kan nlung go manyen ai ura di zon rai nna, hkyi ko rau ni shapro kau dat lu nga ai. Loi gaba ai shat kan nlung go shat ko nna pu gaba de shang wa jang, pu ko gapat rong nga nna, pu hpe matsut kau chye nga ai. Ga ba ai shat kan nlung bai rai jang go, limi 10 jan hkra rai nna, shat kan gata ko hkring rong nga sai, aten na wa jang go grai ja gum hkak mat nhtom, shat kan sapsanap hpe arut, dip ton ya jang, shat kan hpye, shat kan sai pru, grau nna go shat kan bo mat rai wa chye nga ai. Shat kan nlung byin tai wa lu ai sha hpa go sabyin si gaba hta lai nna, makok si, mahko si chyang mung no re. Sha hpa ndai ni ko lo rong ai arai go ruson hte kokyau rai nga ai.   

Kan gaman rai nga ai shaloi, masha a shat kan hta shat kan hkri ntsin grai rong ai, sha bang dat ai sabyin si gaba re ni go shat kan hkri ntsin hte gayau hkat jang gumtong rai byin tai wa sai, dai hpang bai sha bang dat ai sha hpa ni go ami na gumtong rai dai hta wa kap gumpup nna, je magang je gaba, je magang je ja gumtik mat wa sai hte maren, jahtum e go ana masa byin tai mat wa sai. Dai hta lai nna, sabyin si gaba go anga, hkatsu, chyahkan re danbeji lo lo rong ai sha hpa hte galang ta sha jang grau nna shat kan nlung byin tai wa chye nga ai.

Masha lo malo ni go sabyin si gaba sha ai hpang laban bat 1 laman hta kan machyi ai masa pru wa sai. Nkau mi go angui sha byin wa ai re, ana byin wa ai aten shata 6 du ai masha mung nga ai. Lama sabyin si gaba sha yu ai rai yang, grau nna go kan gaman ko sabyin si gaba, makok si, mahko si chyang sha nna, kan machyi, kan chyabung, kro galau, hkyi chyang ni grau nna go ga-hpri nsam sam ai arai madon shapro rai jang, tsi rung de lau lau sa tsi lajang ra sai.

Kan gaman ko sabyin si gaba n mai sha ai

Sabyin si sha mayu, shat kan nlung ana n lu shangun mayu ai rai jang, sha ai shaloi sadi ra ai. Kan gaman ko sabyin si gaba n mai sha ai, shat sha ngut ai hpang she mai sha ai. Shat sha ai hpang go shat kan hkri ntsin hpe bungsan kau sai hte rau, ruson, kokyau a n-gun kya mat sai re nga yang, nlung byin tai wa yak mat sai. Hkup ai sabyin si gaba sharam sha ra ai, mahtang hkup ai sabyin si gaba hta rong ai ruson grau lo ai, galang ta song wa mung n mai sha ai. Hkatsu, Chyahkan, Nga re danbeji lo rong ai sha hpa hte galang ta n mai sha ai. Hkri hpa namsi, ga shadon makchyok si, mihuhtau si re ni hte galang ta n mai sha ai.

Shat kan nlung hpe lu tsi shamai ai 

Sha no gan byin wa ai, gaji ai shat kan nlung hpe go 5% Htansonhkyinna, Jizibang tsi ntsin ga shadon Aumuilazo hte shat kan sapsanap makop ai tsi hte tsi lajang mai ai. Loi gaba ai shat kan nlung, grau nna go aten loi na mat sai shat kan nlung hpe go, shat kan htong jamna hte yu ton nna mani ayai kau ai hpang, tsi dingyang sha nna tsi lajang ra ai. Mani ayai kau yak ai lung ja hpe go ga sho kau ra ai.