Nhkang Seng   Nhkum Myu Lat

Anhte myu sha ni a labau hta,  shachyen shaga ai lam go grai ahkyak ai htunghking langai rai nga mali ai. Moi shong de shachyen shaga ai shaloi, madu a amyu rusai n chye tsun dan ai ni hpe npan dap, shing nrai mayam matu ni nga jahpoi kau hkrum chye ai. Shachyen shaga ai lam hta kasi yu la na matu, lawu de na hte maren hkaja la mai nga ai rai.

La sha: Hkri ma ningtsing hpro htap namchying a jiwoi buga ginra dailup daihpang shara go ganang ta?

Num sha: Ngai ningtsing hkri ma, hkon tsing hkon hpa go, Jiwa kong pa,      Nting laika ga na rai nngai.

La sha: Rusui amyu gara hku gang, laichyum shingteng gara hku lang?

Num sha: Nting laika, Maran dung gasha, laichyum ningchyen Hkon Ba rai nngai.

La sha: Oh! Hpro htap lali, mayu shayi sha rai re nga ndai. Gu do ningtsing ngu rit yo, ngai go Marip dung Kumja ga ko nna pra, Uma Dingsa ga ko nna sa nngai, Marip dung Kumja gasha, laichyum shingteng Brang Hpa ngu ai re.

Num sha: Gu go, noigun noihpye hte htep, basi taugu hte yep rai sani?

La sha: Noishi noigun garai n wa, basi ri boi ri pyan garai n nga, ato ganam go reng? Shalo maka labu hte brep, soidang nhpye hte htep, gumhpro n-ga hte yep rai nit ni?

Num sha: Shalo bu ka garai n lu, sairu palong garai n gu, kinlum n-ga garai n mu nngai.

La sha: Garan numshe ya pru, hka bra aten ya du ra ai, htaning yan hpraning bai hkrum ga, sindai masin dun hkat nga ga lu yo.

Num sha: Htaning yan hpraning ginra shara bai hkrum, wunyo myimam bai rum ai shaloi, gumrong myit hkum gahtep, sailen nten hkum shatep mat lu yo.

La sha: Ganam do ningtsing hpe marit galoi n wai, krowang sindung e galoi mung ashai nga na nngai, no bra saga i.

Num sha: E lo, masu manong hkum yop, chyauhpa rung pai sha hkum masop mat re lu yo.

La sha: Chyauhpa rung pai masop na grai yak, masu manong yop na hkum tak dam lu oi, abui sha wa sit yo.