Atsam Marai
Lahto Brang Ja
Hkying ten go ndum shami wa grai lai mat wa sa hka, Hkon Ba ko mung shabrang ni ko gasung nang wa sai. Shabrang dai ni shan lagu gadoi sha hkyem ai zon re myi hte shani shana Hkon Ba a manot masa hk- rai maja nga ma ai. Hkon Ba hpe sa hpyi ai gasa ni go ju tu ai gala jahpan ntsa ko maidang mara kau shut ai zon rai, myi hpo tsom ai langai mi pyi n rong ma ai. Hkon Ba la dai ni hte dinghku de sha na n gui nna htang kau dat jang go, masha ni yu yang gum-rong ai hte bung mat sai.
Tsora myit ngu ai go, wa tsip makau hkan nau sa garet hkom jang, wa ganu jan myi ginshi rong ai mu mada wa nga ai. Hkon Ba go nlung tok sha hkom ai Htinchung Miwa shabrang wa hpe ahku hku ai kawa shakum ko nna lagu yu tim tsom dum to nga sai. Shan a sumtso hkrun lam go n tsun saga, shana ningsing ningmun gata hta byin ai bungli she re. Hkon Ba ganu yan gawa hpe ganing wa ngu nu ai rai kun? Mahkoi wa jahkrit dat ai nhten, shing nrai go sha hpa lama lama jo na ngu nna asong jo ai, Miwa ni hte num jo num ya hkat na lam myit hkrum lom sai, dai go shanhte nta dinghku labau garai n nga yu ai.
Lam hkan dung jahta ai ko na la ai maumui go, num hpyi gasa dat na masha tam na matu, Htinchung ga de nhtang mat wa ai Miwa shabrang wa go daphkun ko hkrat bang mat ai samyit zon rai, shata ga- lai wa tim n pru wa mat sai. Masin gahtet la ai Hkon Ba Htinchung de shachyut nang mat wa nu ai ngu yang, dai mung tsim hte tsam, shata numra lai ai hpang, Hkon Ba ganu yan gawa hpe shagun dat ai shakram du pru ra ai, prat ting myi prui si nau n hkrat yu ai gawa dingla wa maisau pa dai hpe yu nna grai yon hkrap kau sai. Ganu gawa ngu ai ni sumtsan ga de hkrun lam hkom mat wa ai gasha ni hpe myit dun masin machyi ai lam go, lamu ga hpyi gang gahkying la nna shara magup ahpu gahpyan yu na zon ngu ai hkrai rai na re. Gawa go gasha htunghking tara tot lai ai hpe mung yon nga nu ai. Laning mi jan lai ai hpang, Hkon Ba madu wa hte ma ba nna yu wa mara ai. Gawa go gahkri Miwa la hpe nhtung maga de shadun ton hkra rai woijahta nga ai, ganing lo nga yang, gahkri Miwa la wa Jinghpo ga hkrai ga dan wa nga ai.
Hkon Ba daining asak 70 jan ning du mat wa sai, gashu gasha ni Jinghpo laika lajang magam dap hte sharin jong hkan bungli gun ai hkrai rai ma ai. Ya madu wa mung majan jan yang Utu lahpot grai rong sai.
Manang ni Hkon Ba hpe san ai:“Nang woi de ai dinghku zon rai ahkum alum alom apot rai hkra go ganing di hkang na re ta? ngu nna san yang, Hkon Ba tsun ai:“Amyu langai mi galu kaba wa mayu jang, htunghking hpaji shong aja awa no shachying da ra ai.”