HPAJI RONG AI HKOHKAM
Sok ka ai: Roi Bu
Moi shong de, mungdo langai hta hpaji grai rong ai hkohkam langai nga lai wa sai. Dai hkohkam wa hpe, hpan wa ningsang Garai go “Nang hpa ra nta? Nang ra ai hpe hpyi u.” ngu tsun ai shaloi, dai hkohkam wa go, ngai hpa mung n ra nngai, madu nang ngai hpe hkohkam aya hta nga shangun ai, rai timung ngai hta hpa atsam n nga ai majo, ndai daram gaba ai mungdo hpe ngai gara hku uphkang lu na n chye ai. Dai majo ngai hpe ndai mungdan na, mung shawa ni hpe ganing di uphkang na hpaji sha jo rit ngu nna, hpan wa Garai ko hpyi u ai, hpan wa Garai go, dai ga hpe grai na ra sha dik sai.
Shingrai hpan wa Garai go, hkohkam wa shi hta ra mara ma hkra hpe jo ya sai.
Galang mi na shi a mungdan gata hta n myit madom ai manghkang langai byin pru ai.
Shawa num lahkong go, nta langai ko sha shan rau nga ma ai. Dai num yan go, lahkong yan ma ganu byin wa ma ai. Shawa num ngu ai ni go tara shang hkungran da ai madu wa n lu ai ni rai nga ai. Dai num yan arau shata hta sha ma shangai ma ai. Langai jan ma shangai ai masum ya a hpang, langai jan bai shangai nna, rau gok ko sha yupku lahkong wo ra hkran, ndai hkran rai, gadai mung gadai na gasha hpe lakon nna nga nga ma ai.
Gadai mung tinang a gasha hpe go amo nsam lu matsing da ai hkrai rai nga ai. Rai timung shong shangai ai shawa num go, loi mi ba-la ai sha nrai, lagon mung grai lagon ai majo, gasha hpe chyu jo yang, galeng nga nna chyu shachyu ai, ganu yup malap mat wa nna, chyu hte gasha hpe gamyet ton ai nga yang, shi yup hprang wa ai shaloi gasha nsa n kap mat sai.
Gaga shawa num langai go dung nna atsom sha gasha hpe chyu jo chyu ai, ma chyu hkru nna, yup jang she yupra ko ama nu sha shayup da ai hpang, ganu mung bai yup lom rai, chyahkring mi gan yup pyo mat ai ten hta, ma apyet sat kau ai shawa num go, hkrung nga ai ma hpe shi a ma chyasi hte sa galai la kau ya sai. Yup pyo to ai shawa num go yup hprang nna, gasha hpe chyu jo na matu hta pon dat ai shaloi, gasha go shi gayop da ai hkrang mung n rai to ai sha, ma dai go chyasi rai to nga ai.
Shing rai, ma galai la kau ya ai shawa num hpe “He! Ning hpa rai nye gasha hpe galai la kau ya nta?” nga san dat jang, “Ngai n galai la ai lo, nang nye gasha go ngai pon da nga nngai.” nga tsun nna, ma hpe mung agying ahpum da u ai. “Nang n galai yang go, ndai ma hpe ngai gayop da ai ma sanyen n rai nga ai sha n-ga, ma mung chyasi rai nga ai. Nye gasha go, mi sha ngai gayop da ai hte maren, no hkrung nga ai, ning na gasha go, chyasi rai nga lit dai.” ngu tsun let ma hpe sa gashun la jang, ma si sa galai da ya ai shawa num jan go n jo hkro nna, hkohkam hko de du sa wa ma ai.
Hkohkam wang gata de du shang wa jang, hkohkam wang na magam gun mu htam ni go, num lahkong ga-lo hkat na sa wa ai hpe mau nna, “Hpa bo byin wa ai ta?” nga san jang, shawa num yan go shan yan a lam hpe tsun dan ma ai.
Hkohkam wang na mu htam ni go hkohkam wa hpe shi wa shana sai, shaloi hkohkam wa go, “Um, nan lahkong gara wa mung tengman lam hpe n tsun ai majo, ndai hkrung nga ai ma hpe chyom me ga-ang brang di gahtam ga ya na, nan langai mi chyen chyen garan la mu! Gai gai nhtu la wa marit!” ngu maron dat jang, ma apyet sat kau ai shawa num go, “Mai ai, mai ai.” nga tsun nna, hkohkam wa go, shi a mu htam ni hpe “Nhtu la wa mu!” nga galang bai maron dat jang, hkrung ai ma na ganu go, “Hkohkam wa e, ma hpe hkum gahtam ga sa, shi hpe jang jo kau u, hkrung nga ai ma hpe hkum sat kau lo.” nga tsun maron hkrap nga sai.
Shaloi ma chyasi sa galai da ya ai shawa num go, “Gahtam ga u, gahtam ga u, shing di an lahkong hpe maren garan ya rit.” ngu bai tsun jang, hkohkam wa go, “Ganu ajet majing ndai jan she re.” nga na hkrung nga ai ma hpe hkrap jahtau nga ai ganu majing hpe ap ya nu ai.
Dai shaloi ko nna, dai hkohkam wa go, shong de na hta grau nna mying gumhkong mat sai, gaga mungdan na hkohkam ni mung ndai daram hpaji rong ai hkohkam wa hpe go she no sa hkrum shagrau ga nga nna, mungdan lo lo ko na hkohkam ni go, ja joi shi, joi hkun nga hto sa wa ma ai.
Dai majo, hkohkam wa go, gaga mungdan na sa kumhpa ai ja joi manu dan ai sutgan lo lo lu nna, shi a hkohkam hko na ntot hkan e ja ni hte nyep da ai, shi lu ai hka gom ni, shat sha wan ni hpe ja hte dup da u ai. Shi up ai mungdan mung, shaning 40 ning daram majan n nga, simsa ngui pyo nga sai rai.