Ka ai: Maji Lama Hkon Ra

　　Jan Hkohkam wa

　　Ja palong sumro la nna

　　Tsomhtum nampan ra lata poi sa

　　Ja palong a ningja gabrim ai gata

　　Nampu nampan ni tsom dik hkra shakya la

　　Jan Hkohkam a shingni hkap gashun shakap nga

　　Ningsin pan chyu sha

　　Yong a makau ko agatsi sha nga nga

　　Jan Hkohkam wa

　　Tsit ai hpe ra na zon nga

　　Hkye ai hpe she sharong na zon mung nga

　　Mang ai hpe she bai myit shang mat na zon mung anga wa

　　Langai hpe gang dun la

　　Langai hpe bai pon gayep rai nna

　　Nampan yong a magyep lu shakap la

　　Ningsin pan hpe sha

　　Shi ndum yu nga

　　Jan Hkohkam wa

　　Gara pan hpe grau myit kap ai malap kau nna

　　Hpotni bai sa na

　　Nga sha tsun kau da

　　Nampu nampan ni tsomhtap buhpun hking ro gabai kau nna

　　Abut aye rai nga jong nga

　　Ningsin pan chyu sha

　　Shi a manam n ngot bat

　　Nampan wang ting aningtsing nga

　　Manang jan ni shi hpe jahpoi n ma

　　Jan Hkohkam pyi wa mat sayang wa

　　Ningsin pan mana!