"Eh, rai nga ai lo, byin ai ni go shinggan de gumhpro tam sha mat wa, ndai nta na San Li yannau sha mung Jinghpo mungdo de lungseng hpaga ga sha mat wa, ngam ai la gaja ni bai rai jang, kani hpro tam lu kyin nna dinghku pyi nlu majan, madu jan ni go num htot wa mat ai htot wa mat, nta de gumgai dingla hte ma ni hpe sha gabai kau ton kau da ai, Aitsi ana lu nna si mat ai la masum go ndai mare ko kung dik ai la ni hkrai rai ma ai, ya ngai anga laban jan hpe hkai pyek hpe hpun lung shangun ai hpa, lit li dik ai, ngai nkam galo ai lu." Dingla Roi myi jut e matep pru wa ai myiprui si hpe, myi grip mun hte agrip nhtang kau dat nna, shingdu yon rai dung mat sai. Shaloi Zau Hkun go ara lu, dan sha ngu u nga galu gabu dung nga sai.

　　Dai ten hta, Htu Sam a ganam Nan Di go numla nlom mat sai zon rai shang wa ra ai. Hkum ngau do-rang mi rai galu nna lasi gru gru re ko, kara go magyi mago rai, gut palong mut mut re bai hpun ton nna, mangai yi ya na u shari zon san, Htu Sam ko hkre di sa wa nna: "Moi dim, nta nwa ai grai na sindai le rang, agu gaja nga?" Nga nna wa shakram dat nu ai. Nan Di a hpang ko lasi lamun rai nna, myiman dindin re Maubyin Pau ngu ai wa go, kara hpe gupban zon di zen adoi ton, myiman sai nrong nna, shup la kau ai pa, sho la kau ai dumra ngu yang shi hta grai htuk na zon rai, Htu Samhpe loi gaya ai hku nna: "Htu Sam nang wa sai yi?" ngu san dat nhtom, Nan Di a shingdu de gayin tsap mat nu ai.

　　"Cha le, Maubyin Pau yan Nan Di, atsi jom sha la nna shang wa ai she nrai yi?" Yang Tafa shing ngu san dat nna, Maubyin Pau hpang de lahkong lang ting htingnut mat wa let: "Lauban wa mung du wa sai re hka yi? Jau ko nna nlu sayang me e. Daini go Htu Sam hte nan ang shaa nan wa yi." Nga san dat nu ai.

　　"Hkum ningdang, dai na myiman ko ka ton ai hta grau dan leng nga yang me. Tsa yi lu gui rang? Fo gajam ai ni tsa nkam lu ai nre ni." Yang Tafa tsa gom sharot ton nna, myida myi rai san shati ton nu ai. Shaloi Maubyin Pau n gup gachyum ton nna mani sai sai rai ga nhtan mat sai.

　　"Nan Di nang maning sha Shantung de nna yu wa ai shaloi, ahkye akang ahpum asau rai tsom ai mi, ganing rai namlap myiman bai man mat ai re ta?" Htu Sam ganam hpe mada nna san jang, Nan Di myiman shingdu de gayin kau dat nna htan ai: "Moi dim e, anhte gahtong ninghton de na ni go shani shana namlap simai sha sha ai, myiman namlap zon nrai yang ganing rai na, nanhte myu ga na ni she, shansau hkrai sha ai rai nna hpumsau tsom ai go e. Moi dim nang modo got nna hkum grai pu sadong, loihkring ngai gahpa shingma hkan manat ya na, gumhpro hkyap hkap rong yang loi no jo rit, ngai salik no sa mari la na."

　　Htu Sam nhpye no tam nga yang, Yang Tafa go shi a shangun ma ni hpe gumhpro lahkong tsa gan sho ya kau shangun nu ai. Nan Di gumhpro la lang nna maidang hkan mahkyit let pru mat wa ai shaloi, Maubyin Pau mung tin shapun hkan nang mat wa sai.

　　Yang Tafa Zau Hkun a man hku du she manai hkra Htu Sam hpe gayin yu ton nna, Zau Hkun hpe dun shahpro kau mayu ai sharang let myit ai, nang ngai hpe ginwang ga nga ai, nang hte nte sai nga nna gabai kau ai rai ndai, nang gade wa rai dum tim, ngai daram gumhpro nlu ai, ginwang du ni pyi ngai hpe no hkrit hkungga ai re, nang ngai ko nwa ai go shut nan shut nit dai, ngai ko lama wa ai rai yang, ngai nang hpe hkum ting ja she gayop hkra di, shani shana ndi nhka woi abom hkom na, ya hpa go nrai rai re num ni e ngai a ja gumhpro jai sha si nga ma ai, ngu myit let, ta na nayi ari shayu la nna yu masu nhtom, Htu Sam hpe: "Ndo e hkring ai modo go nang a rai? Daina ginwang myu de lung wa ga, ngai nang hpe pinchi S600 modo galai ya na, modo nnan no re, gade rai nkagat yu ai." Ngu dat nu ai.