Ka ai: Mahko Tom

　　Sun gata hta , numri pan langai mi, gatsi numri agrip ai nhkrit, jan shangkang e gaten ai n tsang ai sha pu wajom wa nga ai.

　　Numri pan e , masha nkau go panlong pan a atsam hpe shakon; Nkau go shana pan a manam pyo ai nngot hpe shagrau; Bai nkau go byinpu shing n rai mok-ya pan…… amyu lo lo hpe shakon shagrau ma ai. Nang hpe go mungkan nampan, shing n rai mungdan nampan nga in mung n lata ton ma ai.

　　Raitim, nang go nye a myit hta nampu nampan amyu hta na grau tsom dik ai nampan rai nga ndai, nang go dai aju hte madu a hkum hpe chye makop maga la nga ai majo she, masha e kam mara di nlu di la nga ai. Ngai ngu yang, nang go hkumhta aju tu timung, marit shingni hpringtsup ai numsha langai she rai nga ndai.

　　Numri pan e , nang go ga sau namhpun n rong ai sun ko, tsom dik ai nampan langai tai lu hkra nga nna, lani hte lani pu hkye shingkang tsom nga ndai. Nang a pu tsom nsam majo, htingbu na shayi sha mung, nang zon tsomhtap mayu nna lagu shakya nga ma ai; Htingpyen na nga rem jauya hte jong lung laka ni mung, palamla tai mayu ai nsam pri, lagat gat nyen a malai tai mayu nga ma nna nang hpe hkrai yu azi nga ma ai.

　　Numri pan e , ginhtong yinam gahti galai ai majo,nang a prat mung shinggyim masha a prat hte bung na hpe tsang ya dik nngai. Gaja wa lahpot mi, nang hpe tam shamat kau nna garen dik mat ni ai, ya nang a prat wa ginhtong yinam a majo n rai, masha a lata majo, no pu tsom nga ai nampan nang hpe gangdo la kau masai re. Raitim, lani mi, ngai rung dap chyinghka lam hku lai hkrup yang, sumtsan masha langai go, aju hpe mahti di shama kau nna laukyip mat sai numri pan a myit hpe chye ai zon zon, shi a nampan kok ko wa tsing ton na nga nna, masha e di gabai kau sai numri pan nang hpe hta lahku la sai.

　　Numri pan e , nang go zingri zingrat hkrum sai ngu nna hkum yon chyai nga sa, ya masha a majo “Kyip mat mahka sak sumri bai lu”na sai. Dai lanu lahku ai aten ahkying chyom go gadun na sai , raitim, bai pu lu laman hta sha go mi na hta grau hkye shingkang tsom lu na nit dai yo!