Ka lajang ai:Maji Shan Lum

　　Moi lai mat wa sai prat hta, anhte Jing- hpo Wunpong sha ni hpaji amyu myu hpe sharin hkaja dinglik yu ngu ai lam hta no hpanghkrat ai majo, mani hpa lo lo mungpru wa yu sai. Bai nna mani hpa lam hte sum mat ai lam amyu myu a majo gaja ai lam amyu myu bai byin wa chye nga ai.

　　Moi shong de la langai wa go jum hpaga ga sha nna kan bau ai da. Raitim lahta de tsun lai wa sai hte maren, jum ngu ai a lang n-gun hte akyu hpe atsom n chyam dinglik yu ai majo, lani mi hta jum nka mi gun nna gat sa wa ai nga yang lam e nsin sin mat nna,lagut damya hpe mung bai hkrit re majo, ganing nga tim shinggan de n mu ai ko she mai makoi na sai ngu myit lu nna, walu la- ngai mi hta jum nka makoi kau da nhtom,nta langai mi ko shang manam mat u ai.Shingrai hpang jahpot shat sha ngut nna lam bai matut hkom mat wa na matu dai jum nka hpe bai sa sho gun na hku sa yu u yang, nka gaman sha rong nga la nna, masin pot ai majo dai wulu hpe htok jahkyet yu u yang, lau si hkyem sai shu kret langai sha rong nga la ai majo, shu kret hpe sumri hte gyit la nna dun wa u ai da. Shingrai hkom wa yang, lam e num langai mi da da dung nga ai ko ntsin shang hpyi lu u yang, dai num jan go da dun nga ai re majo “Nhku de wa la lu su.” ngu u ai. Dai hpaga la wa go shi dun ai wulu shu hpe U ra e sa achye sha kau ya na hpe hkrit nngai, nang wa la jo rit ngu u ai. Raitim dai da da dung nga ai num jan go “N ra na re, nang she wa shang lu su.” ngu u ai. Shaloi dai hpaga la wa mung shi a wulu shu hpe dalang ko dun da nna, nhku de ntsin shang lu mat wa sai. Da da ai num jan mung n dum shami da maka yu to nga, dai wulu shu mung gahtet nna gahtan gumlot wa ai hpe U ra langai mi e mu dat ai majo, sa gan htim achye sha kau nu ai da. Hpaga la wa ntsin lu hkru la nna bai pru wa yu yang, wulu shu hpe u ra e achye sha kau sai re majo, “Dai yu u, mi ko nna nanhte a N-grau tang U ra wa nye a wulu shu sha kau ya na re ngu ni ai, ya ganing di sana lo lau wa rit” ngu u ai. Dai num jan go “Gade mi ging dan yang gade mi wa na re.” ngu u ai. Raitim hpaga la wa go shi a shu sha kau ya ai N-grau tang U ra she ra ai re majo, hpyi tik tik rai to nga ai, hpang jahtum ganing nchye di nna dai U ra sa rim wa kau dat nu ai da.

　　Shingrai hpaga la wa go dai U ra sha gun nna bai matut hkom mat wa let, shi a jum nka mi ting a mat go ganang wa shabai la sana ngu myit sumru let, shana de jan mung bai du mat sai majo, gahtong langai mi hta wa manam na matu shang bang wa nu ai. Dai gahtong ko shang bang wa yang ang sha-a masha langai si nna mang sin nga ma ai ko shang hkrup u ai da. Shingrai shi go nta madu ni hpe “Nta madu ni e, anhte go ndai zon re mang to ai nta ko manam shang jang go nla dap de shayup ga ai.” ngu u ai. Nta madu ni mung shi hpe gaja wa nla dap e shayup manu ai da. Dai hpang shi go nta madu ni hpe “Nanhte a mang atsom she sin mu,shing n rai yang nye N-grau tang U ra sha kau ya na re.” ngu bai tsun masu nu ai. Shaloi nta madu ni mung “Hpa n ra na re, nang hpa hkum myit tsang” ngu mu ai da. Raitim dai hpaga la wa go “Nye a N-grau tang U ra mat jang go nanhte hpe she chye sai lu” ngu let yup mat wa sai da.

　　Shana yuptung du wa sai hte maren, nta madu ni mung yong yup mat shajang masai. Shingrai hpaga la wa go shi a N-grau tang U ra hpe sat sha kau nhtom, U mun hpe go dodap lahta e to nga ai masha mang a n-gup ko nan lup di apun bang ton nhtom a gatsi sha bai wa yup to nga nu ai. Hpang ja- hpot rot ai hte rau, dai U ra rot tam gom masu nna, nta madu ni yong hte bai jom tam wa yu yang, dai U mun go nla dap ko nna nat ra e to nga ai masha mang n-gup ko nan lup to shang wa sai majo, dai mang e sha kau sai re ngu jom tak kau manu ai. Shingrai dai U bunglat hpe tsun wa ma ai shaloi, hpaga la wa go salang lo lo shaga la nna, U bunglat a matu dai masha mang hpe lu la hkra dara u ai. Nta madu ni ko nna mung kaga ja gumhpro hte wa na hku grai tsun yu mu ai, raitim n hkro ai majo, hpang jahtum dai maimang hpe ya kau dat manu ai.

　　(Shata 11nhtoi 13 ya na do)

　　Hpaga la wa go shi myit ai hku bunglat lu tsun la sai re majo, dai moimang hpe sumpan hte astom sha gayop gun nna bai hkom mat wa sai da. Lani mi dang hkom mat wa ai hkrun lam rai sam sai. Shana de nsin sin mat wa ai majo, gahtong langai mi ko bai wa shang manam u ai da, dai gahtong de shang wa ai shaloi, numshang e no du bang wa ai ko nna shi go “Mare ni e nga wulong atsom shangang mu lu, ngai wa machyi ai hpe woi wa nga nngai” ngu jahtau tsun u ai. Gaja wa nga yang masha machyi ai hpe mare gata de woi bang na htung n nga ai majo, mare shinggan e she ton shangun ai. Hpaga la wa go moimang hta grau ging dan ai ja gumhpro hte shi a jum manu shabai la lu hkra nga hpaji amyu myu bai gado wa nu ai. Masha ni ting ting rong ton nga sai Nga wulong ni hpe sau tam chya nna bai sa hpo la nhtom, dai moimang ntsa ko wushat dan mara, jum ahprup di nna Nga wunong hpe gau sharu bang dat ai majo, Nga ni go dai wushat sa sha, jum sa mata sha ai nga yang,masha mang dai hpe atsai awai sa gabye mani makret sha kau ya manu ai.

　　Hpang jahpot nhtoi htoi ai hte hpaga la wa go shi a masha mang dai hpe sa yu masu nna, mare ni hpe bai shabyet sha bang wa nu ai da. Nga wulong mi sha n lu gau wa yang n hkro ai hku shabyet to nga ai majo, hpang jahtum e go dai Nga wulong mi hpe lu shabyet la nna nta de bai gau mat wa nu ai.

　　Shingrai Nga dai ni hpe gau nna wa ai lam ko nga ni dingyang hkom nga yang,punghko grai gaba ai langai mi lam ga-ang ko pat rai dinghkru pat mat ai majo, si mang sa numdan ai re hpe dum lu nna “E......dum sai lo, chye sai lo, dum nta du wa jang nanghpe jahpu ya na lo, hkungga sa na lo.”ngu shaman dat ai hte rau, dai punghko mung shi hkrai lam lawu de bai gumtsun dinghkru mat wa sai da. Shingrai Nga dai ni hpe gau wa nhtom, nta du wa jang dai nga nkau mi hpe sat jahpu ya nna dai si mang hpe mayong shinggong makoi kau nu ai da. Shingrai dai shani ko nna mateng daini du masha si ai shaloi yam nga sat nna jahpu ra ai htung nga mat wa ai re da.