Moi Chyahkyi hte Sharo go jinghku hku nna, mu bungli galo tim shada garum shingtau hkat hkra rai ram ram hkuhkau ma ai da.

　　Lani mi hta Sharo go Chyahkyi hpe ga sa so nna, Chyahkyi mung gabu gara rai sa wa jang, Sharo go shan simai hkrai grai hkik ai hku hkap do jo u ai. Rai yang, hpang shani Sharo Chyahkyi ko ga bai sa yang namlap simai sha jo sha ai majo, Sharo go Chyahkyi hpe ram ram jahpoi kau u ai. Shaloi Chyahkyi go, “Hpotni nang bai sa rit, na a ma ni hpe mung woi sa rit shan hkap jo sha na.” ngu htet dat nu ai.

　　Gaja sha Sharo go hpang shani gasha ni yong hpe woi nna Chyahkyi ko ga sa wa nu ai, sharo go gasha ni hpe Chyahkyi a nta e ton kau da nna yingam de sa wa mat ai hpang, Chyahkyi go sharo hpe shan jo sha na ngu htan kau shut sai majo, shara magup shan tam hkom yu yang n mu tam nna Sharo gasha ni hpe sat shadu kau nu ai. Shingrai, shani shat sha bang wa yang Sharo go “Daini na simai chyom go grai mu na zon rai nga ai” nga ai hte Sharo ningsing manam ai na dat nna, “Goi lo ngai sha ni hpe mung woi sa nngai wa.” nga myit dum dat nna gasha ni hpe shaga yu yang tsim hte tsam gadai n htan pru wa ai majo, Sharo ganu go gasha ni hpe rot tam ningwan mat wa nu ai. Shaloi Chyahkyi go hkrit nna Wa-du ni a nta de sa hprong makoi mat nu ai. Sharo go gasha ni hpe tam jin nna, Chyahkyi hpe n mu ya ai kun no wa san yu na nga nhtang wa yang Chyahkyi n nga nga la ai majo, ganing nga tim Chyahkyi ndai e nyan ai rai ang sai nga Chyahkyi hpe hkan shachyut mat wa nu ai. Shingrai Chyahkyi lago hka Wa-du a nta de hka shang wa ai mu nna, Wa-du a nta de hkan shang sok jang, Wa-du go, “Manang a nta ko mi majoi tam sok hkom ai go manya wa n bu wa nni?” nga hkap pot dat nu ai, shaloi Sharo go, “Ngai Chayhkyi hpe hkan tam ai ngu yang, lago hka nang de hka shang wa nna shang tam yu ai she rai nngai.” ngu u ai, shaloi Wa-du go, “Ngai sha ni lo ai mi go she n hka nga a dong, ngai sha ni a lago hka hte Chyahkyi a lago hka hpe sha mung n chye yu ginghka nni?” ngu ningdang kau dat nu ai. Shaloi Sharo go pot nna, “Chyahkyi na nta shang ai go teng sha re, lau shapro dat u!” nga jang, Wa-du mung pot let, “N nga ai nga yang me nga ai sha anga nga ni go, rai dum yang htim wa yu rit le!” nga ai hte, Sharo go n-gun hte htim gawa jang, Wa-du mung pot n-gun hte hkap gasat rai kri bang wa masai. Shingrai tsomra na hkra jom kri hkat la nna, Wa-du go n dang wa dum jang Sharo hpe, “Daini no hkring ga, nang masin n si yang go kru ya ngu na shani bai gasat hkat ga!” ngu sai, shaloi Sharo go “Mai ai!” ngu nhtang wa mat nu ai. Dai hpang Wa-du go Sharo hpe dang lu hkra nga shani shagu shi a ko garang shaja nga nu ai.

　　Shingrai kru ya du ai shani wa-du hte Sharo go teng sha bai gasat hkat bang masai.Sharo go Wa-du hpe hpa zon n non nu ai rai yang, ndai lang go Wa-du hpe gade lang htim amya dat tim Wa-du a shingma na ninghpu sha lu mahkyit shamong dat rai, bai Wa-du go shi a ko ram ram tai sai re majo,Sharo hpe hkum ting ashot je ton nu ai, hpang jahtum e Sharo go sai nau hto mat sai majo si mat nu ai.

　　Wa-du go Sharo hpe lu sat kau nna gabu makoi rong nga ai Chyahkyi hpe, Sharo si mat sai ngu tsun dan u ai, rai yang, Chya- hkyi go n kam nna n wam pru wa jang,Wa-du yu pot nna Chyahkyi hpe Sharo sai sa ru bun dat u ai, shaloi she Chyahkyi gajong ai lata gahkan pru wa u ai, dai ko nna Chyahkyi go hkum ting hkye mat ai re da.