2015 ning shata 5 asi de, Myen mung Sam mungdo Muje na sumla hkrung gayat sara gaba Lashi Tu Ja hte shi manang yan, Sakhkung mungdo htunghking sok sagon hpung ko wa du ma ai. Shanhte du lung wa ai lam go, htunghking sok sagon du gaba Htoi Man hpe, shanhte Jinghpo mungdo hkan hkan sok sagon la ai n-go htot laika hte sumla ni wa sa jo ma ai re, ngai hpe hkumhpa laika buk langai kumhpa ma ai. Lashi Tu Ja datnu ko sumla ni shalai ya na hkyem bang wa ai shaloi, saboi e mara ton ai datbung ningsa langai hpe hta yu let, grai gabu gajong ai hku: “Aga, sara gaba, datbung ndai ganang na la da n ta?” Shi a myi go mi kon gaba nga ai hta grau gaba hkra hpo shachyen da, datbung poi mat na tsang ai zon, ta lahkong hte matu e manat let yu shati nna mani sha sai sai rai san u ai.

　　“Agu Galau Zung Htang hte shi a hpyenla manang yan re. Shanhte Inglik hpyenla la ai ten e dem ai re, datbung ndai go agu a prat na gashu gasha ni hpe ngam da ya ai la-hkri shingtai rai nga ai.” Ngai mung mani let shachyan ya we ai.

　　“Aga, manu dan dik sai re lo, ngai go n mu yu ga ai le. Sara gaba, ngai hpe datbung gayat la shangun rit lo?” Shi ngai hpe yu shati ton nna san ai shaloi, ngai mung dem la u, dem da yang hpang prat na ni a matu sakse mai shatai ai ngu dat ni ai. Shaloi shi kremra shachyen la nna grai jahtuk let hprek she ngu tsomra lang dem la ai hpang she, myit dik dum ai mani sum hpe n-gup jut e htu gahkyin ton hkra ong dum mat nu ai.

　　Datbung hta shingkang shingwang re hpyenla marai masum a myiman nsam go, mungkan ga ntsa hkrit ai rai lama mi nga na zon nrai ai shinggan myisha hpo da, longta gadun hte labop ko du ai labu gadun bu, labop gaang e du ai moza za, lahpan ndung do matut ai shanhpyi zauhkai hkai, kara galu hpe amanyen sha masit nna pungding ko jo krang krang nna kazu maka zon di manai shangang ton, shanhte masum a lago hpe pai hkra hkran rai tsap ai ko, gaang na grau galu ai Galau Zung Htang go ta shaya ton nna tsap, shi a pai hkra na manang yan go nshang madi let tsap nga ma ai. Datbung dai hpe nye myit hta gadai la ni mu tim yu shakong dum, gadai num ni mu tim yu tsom dum na re ngu galoi raitim myit son we ai.

　　Bai datbung dai kyem ton nna, nye kro hta: “Langai gaman langai share ninghkring hpyen.” Ngu ai sumrai laika ka na ngu, myit saku son sumru ai gade ning she rai wa sai, de a majo, laika tam sok yu, anhte ga hkan Inglik hpyen shang yu ai ni a maumui hkan sagon yu, sumla hkrung labau hkan sengang maumui tam sagon ai ten grai lo sai hta n-ga, gadai hte hkrum jahta tim maumui dai chye nchye sha san shaja rai, madat gahtap hkra ai ni go ngai hpe anya ai pyi nga ma dong.

　　Lashi Tu Ja datbung htot shalai bang nga ai laman, ngai go shi kumhpa ai Sam mungdo ni shapro ai nambat lahkong mungkan majan hte Japan majan ong badang lu ai 70 ning ladu hkrum shaning hpe masat dingsat hkalum ai hkumhpa laika buk galap yu dat ni ai. Ga bo malom hti yu ai shaloi, “Nambat lahkong mungkan majan ninghkring Maho La Tsai” nga ai ga hko hti hkrup nna, lawan wan hpo hti dat ni ai. Laika hta madung shachyan dan ai, lani mi na Japan majan man hta, Maho La Tsai go manit 5 laman e Japan hpyen marai kru hpe kolanri hte galun sat kau lu nna, Amerigan hpyendu jaubu Wuilen Sati Wun e jo ai nambat langai share ninghkring dakhkama kumhpa lu la nu ai, nga ka ton ai shingdu e, (Maho La Tsai:1906 ning shata 7 pro 5 ya hta shangai ai) nga ai laika hti hkrup rai, myit hta grai gabu let, kaga laika bo bai tam hti wa ni ai.

　　Maumui langai hta bai ka da ai: Sak 14 ning du ai, shaga mying Ngai Tong ngu ai Jinghpo shadang sha go, Myen ga, Inglik ga, Gala ga, Japan ga chye madat chye shaga nna, kin yu bungli hta grai dang, Japan nga ai hkan lamu shamying rai sa hkom chyai masu nna, Japan ni majan gara hku gap hkyem ai lam hkrai sa sok pru wa wa rai, Japan ni hpe majan agying sum agrop shangun ngun rai, Japan ni pyi myit she htum mat nna, zoi hkrai bai hkan zoi yu masai, jahtum e shanhte hpa nyeng nshadu ai jahkrai ma hkraichyip Ngai Tong e Wuilen Sati Wui hpe shiga lagu sa ya ya re re chye ai hpang, Japan ni Ngai Tong hpe nju ai myit byin mai to maya achyak sha kau na daram rai, Ngai Tong hpe rim la nna, ja ku gadoi di kau ya di sat kau manu ai, Ngai Tong hpe zingri sat kau ai hpang, hpyendu gaba Wuilen Sati Wui nan majan donghkon pyi do mi shayu hkra jahkik ai makoi mayang poi galo nna shagrau shaa sai, nga ka bang da ma ai. Ngai go maumui dai yan hpe n lo hti dum dik rai, nsa gaba sho let: “Tsa Lum e, ndai laika hta ka bang da ai Maho La Tsai yan Ngai Tong a maumui hpe loi galu nna ka shachyan dan to rai na wa, no hti mayu ai ko htum mat sai.” Ngu dat ni ai.

　　(Shata 11 nhtoi 20 ya na do)

　　“Cha e, Maho La Tsai no nga ai, ya shi asak 108 ning du sai re, le Sam mung ga e atsom sha no pra nga ai, shi go Japan majan na lam grai matsing ai, shi ko sa san la yang mai na re le.” Lashi Tu Ja mani sai rai ngai hpang de mada let tsun dan ai ga hpe, ngai nau n kam ai. 108 ning ting pra sayang, Japan majan na lam no matsing na n shadu sai, mi no pra nga tim myi n mu na layong re dingla rai na shadu let:

　　“Shi teng sha no hkrung nga ni? Ga no lu shaga, ana no na a ni?”

　　“Hehe, zeng sha go e, Sam mung Tongji ko sha nga ai. Shiga ndai go maning sha sara gaba Maran Ja Gun Maho La Tsai ko nan sa san la nna ka bang ai re. Shi go nanhte Yinkyang ginwang Jansi Ji na Munggum na re da. Ya nta ga e shi gasha no nga ai, sara gaba Maran Ja Gun shanhte nta sa du nna gasha Zau Ong hpe nan wa mu nna, gawa a lam ni tsun dan, gawa hpe sa jahkrum ga, lam shabrai ngai shapro ya na ngu so ai re, gasha wa nkam let: “Ngai pyi 80 jan ning du sai, lupba de lago ado mi lup mat wa sai, wa go n hkrung sai, shi hte kunghpan maka gumlan gaba ten kon n matut mahkai mat sai, kaga masha she rai na re.” Nga rai nkam si ai da.

　　“Jahtum e gasha n hkan sa sai da kun?”

　　“Za zin za rang ngu so jang she, nnangnon non nna nta gaput mat ai, nta nnan bai galo ai rai n ngut ai, lam mi go sak gaba sai, bai lam mi go gawa chyinghtok mu galo ai re majo, jau jau ko nna shanhte hte n matut hkat na hku gadi kau sai, shing rai n hting- let hkat ai nau na sai, gawa nan rai n rai ma n chye hpa re, lam mi go sumtsan lam hkom hkrit ai ngu hkap tongban kau dat ai re da. Shanhte go gawa maigan ga ko sa si nan mat sai she n shadu i.” Nga tsun ai myiman ko, teng nan teng sai ngu kam mat ni ai.

　　Chyahkring na laman nye myit hta, dingla dai go lam no lu hkom ai kun? Ga no mai shaga hkat ai kun? Myi no mu ai kun? Shaga ga no na lu ai kun ngu myit shakru bang wa ni ai. Anhte nta e sak 105 ning du ai, lawu lahta nta na annau ni a gamoi ang ai Loroi Ji ngu ai hpe woi nga lai wa saga ai. Moi ji no hkrung nga ai ten, du krung nau dangu mat, shinglang go galu rai, dung yang lahput lapran ko myiman chya rai, yu tim bo masum tu ai zon she rai mat ai re, shi si ai shani, hkum mago mat nna du-u ko hta bang ai shaloi lahput pyi do mi no kra ai she hta kau sai. Shi no hkrung ai ten hta myi n mu mat, lam hkom yak mat re hpe son dat jang, Maho La Tsai hpe jau tak grai tak ra mat sai.

　　Lashi Tu Ja ngai myit ru ai mu sam ai, ga-hpri n-gup mi lu la ai htom tsun ai: “Tsun ma yang, na go loi layong sai da, raitim shaga hkat yang hpa ndut ndang re nga ma ai, ga loi ja ja ngu san yang asan sha no na ai re da.”

　　“Tsa lum e, ngai shi hte nan nan hkrum shaga mayu ai, ganing di sa tam la na kun? Chye ai wa ahka lu ai nga ga malai hte ma- ren, nang tsun dan sai re go, nang nan hkan woi tam na nhten lo?” Ngai gatu garu ngu hpyi shon bang wa ni ai. Ndai go lani mi shong lu hkrum yang yong a matu akyu rong ai mu gaba langai rai nna, myit hta galang ta nsa tam lu nlot hku son dat ni ai.

　　“Aga, nang shi hpe shade ahkyak la jang go, ngai woi hkom ra sai ga rai nga ai. Teng sha ya shi go no hkrung nga ai 101 hpyenla dingsa ni hta na myi na n-gup aga no kung ai go shi sha rai sai da, shi hta sak loi gaji ai langai go nga ai re, madat yu yang yupku e galeng nga, ga n lu shaga sai she nga re ma ai.” Shi tsun ngut ai hte ga-hpri n-gup mi bai lu dat nu ai. Shi a ga-hpri bat ngai marop hkrup tim n lu mayu mat, Maho La Tsai ko hkrai chyung mat sai. Gabu ai myit go Lashi Tu Ja hpe pyi hta pon gumjot kau na zon she nga mat sai.

　　“Tsa lum, nang ndai daram gaja ai shiga gun wa ai majo, ngai gabu dik sai. Myit ai ko du yang suthti po ai da, ngai 101 ninghkring ni a maumui ka na ngu myit son ai tsomra ning rai sai, dai lam chye mayu nna, sara gaba Sau Ka Mai yan Bum Shang Hkong hpe pyi Myitkyina ga na Japan majan labau sok ka dat marit ngu htet ai re. Gade ning she la kau sai, daini go gam rong ai wa wa du pyi yupnga ai ngu ai nhtoi she rai sai, nang lawan wan sha nwoi sa yang go n mai na re lo, sak gaba sai ni hpe go ten shachyut nna hkan tam san la ai hta nlai ai.”

　　“Mai ai le, ngai Muje de du wa jang gara hku hkom yang mai na no wa san sagon yu nna bai shana wa na, nang hkyem let la nga magang u le i.” Lashi Tu Ja myit mi asu nga hkro sai majo, ngai n chye tsun hkra gabu mat ni ai. Bai lam mi go datbung a akyu re ngu, byin mai to shanhte hpe pyi salam na daram myit dik mat ni ai.

　　Lashi Tu Ja ni yu mat wa ai gade ya nrai yang gyenan du ra ai. Shi tsun ai: Mandale lam hku modo hte masum ya masum na hkom jang Tongji ko du sai. Modo boi shabrai lani mi Miwa gumhpro masum tsa tsa jo ra ai, lam lapran na modo sau, hkom sa masha ni a yup sha shabrai ma hkra ngai hpe pru na hku tsun u ai(Dai go n tsun tim ngai pru chyalu sha rai nga ai). Hkom ten ntsa lam gadi ton sai. Ngai go rot saga nga ai shiga sha la nga sai. (Bai matut hti ga)