Bum lai

Goi sha lo...

Shagong bum tsit shingwun gata

Ngai shingran hkum gu kat wa

Daido buga shingkang ai

Hpun-gam hpunnong ni she rai

Buga hkrang man sumri sumdai

Dinghkong maling dinghkri rai

Sumru n ma

Myit yu mang yu n hpra

Daido buga hte hka ai

Sumshi jan ning rai mat sai

Ndum shami bo hpro wa run mat

Buga shingran shi hkrai jat

Lap li gata pra ai masha

Hpun-gam hpunnong hpe adum nga

Mare bo na masa hpun gaba

No tu nga dong ngu myit mada

Mare bo na kinsa wa-tsa hpun wa

No shingnyip nga dong ngu myit nga

Hka-htu ntsa na larang hpun mai

No tsom nga dong ngu myit nngai

Mare htingwan na nbu hpun ni

No tu nga dong ngu myit sumhti

Hpun-gam hpunnong marit maroi

Ngai nan buga wa jahproi

Marit sumhtang lu in buga wa

Lap li ningtsing yu na yo shada

Ahkang zin-ya hta na ngu wa

Buga hkrang man wa mada

Sumhtang mabai ba na ngu

Mauhpa hkrang man hpe wa mu

Mare bo na masa hpun gaba

Apot du hkra got mat wa

Mare bo na kinsa wa-tsa wa

Apot sha ngam mat sa hka

Mare htumpa na latsai hpun galu

Kran gahtum ton ai wa mu

Nbu hpun ni du hkra

Zingrat hkyi ni sha ngam kau da

Hkahtu ntsa na larang hpun mung

Asan sha kran agyum

Mare bo kong kon ngai wa yu

Buga ting lali ai hpe mu

Ngai hkre di hkru sa yu dat

Nhprot shingnom n masat

Du hkong mai da gaiwang gaba

Hpun sau sha-mu tu ring nga

Hkaro hkram wam gata ngai sa yu

Shaban kumgau saugo tu ai wa

Grau tso ai kong kon ngai bai yu

Kaga bo hpun amyu ntu

Hpun sau sha-mu tu ahpra

Nampu nampan mung n mu mada

Mare shingnom de bai du

Namji namchyoi n garu pru

Numroi gat nyeng pyen ai n mu

Gat nu ladang mung n pyen pru

Si mai sun de sa yu yang

Hkun hkro ai ko ang

Madi ga sau kachyi mung n rong

Sa hkom dat yang ninghpu mong

Laubu chyinghkrang gak gak rai

Logadat nam hpun lang ra sai

Ahka n jo yang n lu sha

Ahka ganang sa ja la na

Ngai hkaro hkram wam gata sa du

Hka shi hka yan hkyet ai sa mu

Hka shi hka nu hkyet mat wa

Palun wa lai hpyin yang hkro mat sa hka

Nam nga simai bo hkum yom

Hpun-gam hpunnong ma hkra tom

Madi ningli hkyet yom mat wa

Nsi nai mam madang nyem mat hkra

Hpa rai hkun hkro mat wa

Myit yu mang yu na mi nga

Hpungshon hpun hkai ai nga

Nta shachyo rong ai nau nnga

Madi na ngau hkai a hka

Sumri nta myit du ra

Hpunngau chyahkro nta rong yang nnangnon hpe hpa n tsang

Ndai hte myit lu nngai

Buga ndau munglun rai