Madu dap shiga Shata 11 nhtoi 12 ya hta Yinkyang ginwang Shadan krung buga Wu hpai mare ni 2023 ning lado na htunghking hkringhtong matsi htu ma ai.

Wuhpai mare ni go mateng daini du htunghking hkring htong matsi hpe ding yang no htu lang nga ma ai, ndai lang mung shi sok sara wa wa sagon du yang, nhtoi 12 ya shani mare ting hkum nna salang Kamai Nong hte jan Adum Ji Pa shannu wa ni a nta ko jom gahkyin zup nna n-gu ni jom gahkyin la, bang ra ai shingra tsi ni jom gahkyin la rai sa jom htu ma ai.

 Shong ningnan e nat ra dohta ko matsi pa garai ton na lajap lap shong nyep ton, nkau go n-gu shadung ko shingra tsi ni gayau bang rai htu, rin la lajang, matsi lamyit bai galo la rai, dai matsi pa pa na shadung hpe chyahtai ko ru bum da nna ahka mat madit tik la nhtom bai pa ma ai. Matsi pa pa ai shaloi anum ala masat nna azum zum di pa ma ai, din din re hpe go anum ngu, yon yon di pa la ai dai hpe go ala ngu, shingdi pa ton nna matsi pa a gaang ko yungnu hte dip lahkyok da nna dai lahkyok ai ahkang ko shanam hkyep bang ma ai, dai go shadai masat ai re da. matsi pa dai ni hpe pa la nna nyep hkyem da ai lajap lap ntsa ko wa garai ton ma ai, ton ai shaloi mung azum zum run run di ton ma ai, loi gaba ai azum mi hpe go madu nga nna ton ma ai, dai go htu ai hpang jahpot matsi gale ai nga nna dai yan hpe sa gale ma ai, shingrai matsi pa ni ton ngut jang lajap lap bai mara magap jahpun da ma ai.

Hpang jahpot go dai masat da ai pa gaba zup dai hpe sa gale ma ai, dai hpe matsi gale ai nga ma ai. Bai nna mali hpot nga ai jahpot matsi hta ai nga nna matsi dai ni hpe sa hta garan gam shagu gun la ma ai, gadai mung gadai a nta de gun wa nna wa lam jahkro, garau jahkro rai hkro jang ndum ko bang nna shachyip da nhtom kung jang matsi dai bang nna malum tsa dun lu lu rai ma ai.Ndai shingra tsi hte htu ai tsa go lu tim jap dui hka dinggreng nga nna lu tim bo n machyi, hkum mung nhten nga ai.

Matsi htu ai shani matsi chyam ai nga nna nbo tsa pa dun da ai hpe matsi hta ai shaloi sa jom hpo sha ma ai, tsa pa dai mu jang go matsi ndai go hkrak sai ga re.

Matsi htu ai shani go shadung ba pa pa sha, lahtong gyen ai ni go grai gyen nna ma ni hpe mung n jo sha ma ai, hkri ai rai mung gyen ma ai. Moi na ni go matsi sha n hta yang num la pyi n mai ganon ai nga nna gumgai ni hkrai sha sa jom htu htu rai ma ai. (Ka/dem ai Alat Gun Ong)