Shata 11 nhtoi 13 ya shani Yinkyang ginwang shadan krung buga Wu hpra mare ni a ya yi ko wuhpra mare ni woi galo nna, Yinkyang ginwang gata ginra nkau na htunghking sharong ai Jinghpo wunpong amyu sha ni hte Nshon, Nmau de na htunghking hpe sharong ai Jinghpo wunpong amyu sha nkau ni du hkum nna, moi na htunghking nhpang ba hkringhtong hpe wu wu di di poi gaba hku jom galo pyo lai wa masai.

   Poi shani jahpot hkying 11 ram hta shi sok sara wa dai ya yi ko wa du sai, ya yi go Wu hpra mare ko nna gade ntsan ai, Nlong hku mare lam dung lahta maga rai nga ai, shi sok sara wa lam kon nna mada yu dat yang ya yi go bum kalom ko alen nga, grai pyo la nga ai, yi wa ko du lung wa yang, yi wa mung moi na bum yi wa zon shangu ni hte atsom galup da nna sinli machya mung chya satsom da, wa hpu wa hpok htemlem ni mung dun da nga ai, machya e nbung layit ni mung galo shachyai da nga ai. Yi yang de mada dat yang yi mam tu ai n mu ai hta lai nna, kaga ahkai ningmai shapreng nampu nampan, shinglim shington du hkra grai tu hkum tsom la nga ai,mam she ting da yang grau grai mangoi  na  zon rai, ngai grai myit marit shingran kau ni ai.

   Ngai dai zon myit shingran chyai nga yang, madu bu ni shong madum sumpyi, mahkon mangui nsen ni hte shapyo sa wa mara ai. Poi lusha lajang ai ni mung du sa wa sai, shadung ba pa pa ai ni pa, shadung pung gabung ai ni gapung rai kyin bu bang wa nga ma ai.  Manam tau na ramma ni a mahkon mangui pyo la ai gata, malum tsa hkap gam nbat la na mahkon ni mung tsa dumbung, pohkyon lahpo ni lang rai hkap nga ma sai.

   Chyahkring rai yang, Poi sa manam ni htongbau shup sheng hte wui nga du hkrat wa mara ai. Yinwang maron ting htunghking madum sumpyi, mahkon mangui, shangon ohye ningchyun ningtam manong ni hpring wa sai. Yi wa gata, asak gaba sai ni sa jom shaga sha- chyan hkat nga ma ai, yiwa ndo e htongka ka ai ni ka manot nga ma ai, bai yi yang de go masha lahkong masum jo, mali manga jo, rai pyisun pyiman ni dum shapyo, htunghking ningtam manong ni sho rai nga ma ai.

Shingrai, pyo nga yang, jan ngai rai wa ai hte, jaiwa gaba Dingga Gong zahpo yit ra na mam numla lalo lakon la ai lamang hte poi hpungdim dat nna, du sa ai shawa masha ni yong gabu gara rai, nhpang ba lu sha shadung ba pa gam sha, shadung pung gabung yen sha, shanju shan ju gam sha, mangai japhtu hte chyanun chyu jom gam wunbat lu rai, moi na n hpang ba htunghking hkring htong lamang hpe grai htap htuk hkra jom shapyo lai la masai. (Ka/dem ai  Alat  Gun  Ong)