Naisam hkye go danbeji nyem, gai, lin, na re hte wuisinsu gadon re majo, aten na na wa hpe naisam hkye hkrai jo yang, wa kan chyabung, amyu shagu lu sha rai rap ra nlu sha la rai nna, wa hkum npyo, gatu garu chye rai nga ai. Dai majo naisam hkye wa hpe jo na rai yang, kaga wa shat ni hte chye gayau jo ra ai.

　　Wa shat gayau ladat: Naisam hkye hpe ga hte yat hten ai ni shong la kau nna, rin manyi la ai htom, hkangui hte fuhowuisin jahkai tingsan mi hte gayau la nhtom, ntsin 65%-70% daram bang nna gayau ton na. Dai gayau ton ai wa shat hpe nsa npru, ntsin n gayun, ningtuk sat kau yu sai balasatik shing nrai byilat ga hte galo ai wa htung ko htun shatsu bang ton na. Byilat ga hte galo ai wa htung htumpa ko hkangui limi 25-30 daram htat hkra nyep ton nna, gayau ton ai wa shat hpe ru bang magang dip magang di, ahku nhku hkra htun bang da nhtom, ntsa e hkangui alam mi bai ga-up ton na.

　　Wa hpe jo na ladat amyu 2: 1.Aten 3 ya htun shatsu ton ai naisam hkye wa shat hpe, shadang shadon nna hkainu shingmun hte kaga wa shat ni hte gayau jo na. 2. Wa shat gatsing hte shong gayau jo nna, jahtum e shadu hkut ton ai naisam hkye bai jo na.

　　Jo ang ai hku wa shat jo sa wa na: Wa hkum, asak, wa yi wa la re ko hkan nna wa shat sharam jo sa wa na. Wa shat amyu mi hkrai nau hte jo jang, kaga wa shat ni nlu sha ai majo, wa gaba wa na lam hta wa-hkye hkra chye nga ai. Mayu na hku tsun ga nga yang, wa gasha, wa yi, wa li, wa la re ni hpe go loi sharam jo nna, lani mi kaga wa ni hta 20% daram sha shadon jo na, kungkyin 35 a lawu de na wa hpe lani mi naisam hkye hte wa shat gatsing kungkyin 1.5-2.5, amyu magup hte gayau la ai wa shat(配合饲料)kungkyin 0.8 jo na, kungkyin 35-60 du ai wa hpe go, lani mi naisam hkye hte wa shat gatsing kungkyin 3.5-4.5, amyu magup gayau ai wa shat kungkyin 0.9-1 jo na, kungkyin 60 a lahta de du ai wa hpe go, lani mi naisam hkye hte wa shat gatsing kungkyin 5-7.5, amyu magup gayau ai wa shat kungkyin 1-1.25 jo na.

　　Sadi maja ra ai lam: Naisam hkye gatsing nmai jo ai, ndai zon re jo jang wa kan chye hko, kan chyabung rai nna, wa shat nsha mat chye rai nga ai.

　　Ningtuk sha hkrup jang hkye na ladat: Wa naisam ningtuk sha hkrup ai aten 3-4 ya rai jang, gahtet shadang chye tso wa, wa shat nsha mat, hkyi chyat chyat, wa hkyi ko sai chye lom rai nga ai. Wa ningtuk sha hkrup ai mu jang, kan hko tsi jo ai hte rau, 0.1%-0.2% du ai Gau- mungson gya(高锰酸钾) shing nrai 1% re lusonhtung ntsin hte wa kan gashin ya na. Bai nna 20% re wulohto tsi haushin 50-100 daram Wa sai lam ko htu bang ya na. Nsa sho yak rai jang wa hkum ko anchagyen(氨茶碱), shing nrai ahto hpyin(阿托品), nihke shamyi(尼可刹米) re tsi htu ya na. Salum n-gun yom mat rai jang salum n-gun jat tsi (Hkyangsin zi) re htu ya na.