jvoshu yoq mi zhvoqshuq ri ge le ga awing 10 zhung gi xibve ngvut le, awing xibve wo zhvoq shuq ri gi shuq ri ngvam mai lai mu, gungdu ri wangzan lui jvoshu yoq mi gi haizhung nozo abo ga, layvum bang wangzan ra midvu haizhung awing ngvut le lvu  nga- nvung chomjo wu shang.

Sanghi zhung gi yin-e ga le maujon pyu ri awing gvut zhvoq shuq ri ge le, asu xi mi  hungzau, gu-qi ga e hau gvat zhang zhe ge le ga. Laqo gi, soq ri wozhat, sui ri wo zhatlvuq yu ra ga. jvoshu yoq mi gi soq ri aluq, sui ri aluq zhung no dattoq lo le, haumu lui huloqbu ga le angqi nezo eq  hungzau ga e miko shi xi ri wozhvoq shuq zhang gi nganvung xi yam yoq mi ra le gungman ze ri wozhat lvuq lui noshau le, dum ngvut zhang zogvat eq nganvung gung mi yvang gungman ze wozhat lvuq yu ri ga.

Yin-e ga le maujon pyu xi zo zhang gewang bo e 2 qo gi myoqzhi jenglo ri ga, jvoshu yoq mi gi myoqzhi myungmyung ga yvang nyiwui lui myoqzhi wup wup ga nyiwui le, zheyvang gi loqpyo zhvinvan lvumnyau nau bang myoqzhi zhe ten nau dik le, xisu dut zhang gi yin-e ga e maujon pyu ri awing gvut zhvoq shuq zhang gi myoqzhi myung myung ngvu no lo xi ri ge gi, myoq zhi ri jeng lo ri ga.

    jvoshu yoq mi gi ori myung myung ga  nyiwui bum le.Haumu, jvoshu yoq mi

yin-e ga e maujon pyu xizo zhang  3 qo gewang  bo le. Yin-e ga le zoze mi gi weisensu eq teja ga e gungman zoze bve myodik le mu, jvoshu yoq mi yin-e ga e zoze xi wozo zhang gi jvoshu yoq mi myungmyung ga nyiwui dvo le xibve wo ge lui gungdu ri wangzan lo, xiyam yoq le nobau ri wo tangzing dvo ri ga.

Jvoshu yoq mi myung myung ga nyiwui zhang gi huloqbu ga e angqi ne zo ri awing  zhvoqshuq gvilvang ge ri ga, huloqbu ga e angqi ne zo xi ri zhvoq shuq ri gi lungbum, hungzau bve gvat lui zhvoq zhang zhe ge le, xisu gvut zhvoq zo zhang gi cammyvi myvi lo ra ri wo fang le, jvoshu yoq wang lo mai gi cammyvi no byu ri myo le, haumu xi yam yoq mi gi awing xizi woshuq zhang gi cammyvi ri shau le, zheyvang gi zoshang wui ri anum yang zhvoq huq ri ge le.

Jvoshu yoq mi huloqbu ga e angqi ne zo ri awing zhvoq shuq zhang ge le 2 qo gi gai ga hau wozhat lvuq yu ri ga, jvoshu yoq mi gi gung ma gai ga hau zhaqyvang zang lvoq pyuq le, haumu awing xi zhvoq shuq zhang gi gungman ze zhaq wo zhat lvuq yu ri ga.

Jvoshu yoq mi zhvoqshuq ri ge le 3zhung zoze gi, midvum eq angqi zhvoqzo zhang gi, gungdu mi wang lo ra nobau ri wofang gi, byu ri amang lui, sui myvang no, sui ma cubvat bve ri wolvoq nyvum byi le.

Jvoshu yoq mi gi humzhang eq waq showui zhvoq zo ri ri zhaq ge ri ga, hai zhung gewang bo ri lvu ga zhang gewang bo le qo gi, humzhang anum wo zo zhang gung jiji      jvangjvang zi wo dut lo ri ga, akui bve numnang lawam gi ngundvung toq lui gungdu jiji jvangjvang zi dut shang ga bum le, haumu, nganvung gungdu jiji jvangjvang zi dut nau zhang gi humzhang zhvoq zo zhang yvang ge be, humzhang zo ri gi, ungkau ma age ze ri wo qom byvom toq yvam ri ga.

Jvoshu yoq mi gi humzhang eq waq showui zhvoq zo ri zhaq ge ri ga, hai zhung gewang bo le lvu ga zhang gewang bo le qo gi, ungkau gvumbvai ma duq haubve ri wo qom kattoq yvam lui gungdu wangzan lo ri ga, nganvung mingbyu wui gungdu ma 80% gvo gung mi gi duqbo le, duq xibve awo kat toq yvam zhang gi, gvumbvai no dut lo lui, i awo zhit e no ri dat dut ri ga, haumu miyu mi nganvung humzhang xibve myozhvoq zo ra le.

Humzhang anum wo zo zhang zvut ma duq ri wo kattoq ri ga, nganvung su qungzvau anum zvau nyi zhang chizo ri age be mai gi, humzhang myozo shang, akun zhang sheq   ungkau zvut ma duq wo kat toq lui qungzvau zvau ge ri ga.

Jvoshu yoq mi gi wandvu nyuq zo yam be, haumu lui, nganvung wandvu nyuq eq bedufu shonvik lazvui gvat mu zhvoq zo zhang gi, nvutnam nvutko ri ge, myoqdong munsui yuq ri ge ri ga.

Jvoshu yoq mi  lenzi ga e mi ngvantung shatang, guqi gvat lui awing zhvoq shuq zhang gi qungzvau zvau ri ge,  ungkau sing zhvung ri wo migum gvut gewang bo le.

Wangzhi myuq eq waq showui, wuji woq xibve zhvoq zo zhang ri gungdu wangzan yuqyo ri ga, ximai lai mu qipam age mu wamshun hai shun zhang zhvoqzo gvilvang ge le, wamshun shun lo ra ri wo fang ge ri ga.

Bungsap mi woq-u bauzun gvat lui     awing gvut zhvoq zo gvilvang zhaq ge le, sun xizhvau anum wo zo zhang gi unuq leklo lui mizving ri tan le ga.

Haidai ga e zoze eq showui jvuizo zhang ri gungdu zhaq wangzan le, sun xizhvau anum wo gai zo zhang gi lingbu no toq lo ra ri wo fang le, qising sing ra ri wo fang ge lui gi suicho tan lo ra ri wo fang ge ri ga.

Pehum sun anum wo zhvoq zo zhang gi wamkau ma bau hau bve ri wokat toq yvam lui gi, ishi chui no bo lo ra ri wofang le, yuqge wui qenleq xenyen ga no xibve toq lo ra ri wo fang ge ri ga.

(Puqsu Zunwa Nangbang)