Sangqang dang lakun zhoq le gi xi su ga “Sikgam mang ri gi abvun mai hi mang le, byu mang ri gi qi mai hi mang le ” haumu lui, jvoshu yoq mi nganvung qi lago nyvun lui gungdu wangzan qo son zhe shang!

Nganvung qi ri nyvun lui yvumsing gungdu wangzan qo gvut zhe ngvut ri gi, gungdu kimi shutshai ri abo kimi kisu ga ri ano, qi nyvun ri luiyo zi ngunze toq no ri amu e yvumsing gungdu wangzan qo wo gvut zhe muge lalvum ngvut le, haumu qi nyvun zhang gewang bo le laqo gi lagung ma sui wo yui zhvoi le, lagung ma suisoq ri rot lui, ungkau ma sing-u singzvut bve ri wo migum ge ri ga, 2 qo gi chi eq qi nyvun chi zhang gi chi shogvuq mai lagung mi nyunwang lo lui ungkau mi no toq lo ra ri wo ya ri ga.

Hau mu numnang wui haizhung chi eq qi nyvun zhang gungdu wangzan yuqyo le qo ma wangzan paqzhvi dai shitjvo dvo le gi xi su ga.

Qitang lalik no zhang nyvunchi ri ge le chi gi xibve ngvut ra: Myiwa mying mai dai le zhichonwu eq zhicauwu ga e chi lazhung 20 keq，Aiyeq ga e chi 10 keq，wulinzhi、sangpo shi 、hungfa ga e chi lazhung 30 keq gvat lui nyvun ri ge ri ga.

Kisu nyvun ra lvu ga zhang atoq mi daidvo chi xibve ri au mai zhvoq zvu lui dvocham dvo mu lada nayi 20 minit gvo nyvun mu lanyi 2 da nyvun ri ge le ga.Xisu gvut anum wo nyvun zhang gi ungkau ma ngamsoq wo lvoq toq yvam lui gung ma no xibve ri wo ge le ga, zhe yvang gi qitang lalik no bang bve zhe zhaq ge ri ga.

Ucam jut zhang ge le qi nyvun chi gi xibve ngvut le, danggui eq hanlencau ga e chi lazhung 30 keq，cebohaq ga e chi 15 keq gvat lui nyvun zhang ge be, kisu nyvun ra lvu ga zhang chi xibve ri shabu bvan eq tup lui wui au mi zhvoq zvu yu lui dvo cham dvo mai ulvum hi chi yu mai, ulvum chi wing eq gi qi dum nyvun gvut lanyi 2 da gvo wo gvut zhang gi cam yoq ri zhaq ge ri ga.

Chi xi eq ulvum anum wo chi zhang gi yoq byuq be cam ri yuq lo lui, cam yoq bang chi ri zhaq ge le ga .

Gungwum abo dutzhang ya ri ge le qi nyvun chi gi xi bve ngvut le. hongqi、dang- shen ga e chi lazhung 20 keq，longyen shi、yanzhi ga e chi lazhung 10 keq， muxang、gvancau ga chi e lazhung 5 keq ri izhvam 1000 haushen eq nyvun lui zhvoqzvu yu mai ngam lo zhang aqing 30 minit gvo lanyi qi lada nyvun lui zapzap 10 nyi gvo qi wo nyvun ri ge ri ga.

Chi xi eq qi nyvun gungdu ma qipam xibve ge lo mai laimu, sui ri wo lvoqding mu imyit zum zi wo dut ra ga.

Gungdu jiji jvangjvang zi dut nau zhang qi nyvun ri ge le chi gi xibve ngvut le. Humzhang gvuq 100 keq，fulin 30 keq，sangpo shi 50 keq ri izhvam eq zhvoq zvu yu lui wuibu lumlum zi ga lo zhang qi nyvundvo lui yvumsing ka jo mi no zhang kajo mi dunsut dunlving lui lada 30 minit, lanyi lada zapzap 10 nyi nyvun zhang byu gungdu ri wo ji lo ri ga, chi xi eq nyvun zhang gewang bo le qo gi gungdu ma izhvam ri wo shoq toq yvam gi sui yui ri ngon ri ga.

Gungdu myungmyung ga nyiwui zhang ge le qi nyvun chi gi xi bve ngvut ra: yejau teng ga e chi 30 keq，yanzhi ga chi e 10 keq，lunggu ga chi 20 keq，fu shen、 danggui lazhung 12 keq，chaihu eq mikoshi lazhung 15 keq，zhenzhumu eq duzhung ga e chi lazhung 6 keq, chi xibve ri gi izhvam gvat lui nayi 20~30 minit gvo zhvoq lui chi zhap yu yvam lui wuibu 39℃mvak zhe zhang qi nayi 20 eq 30 minit gvo nyvun zhang ge be, ximi numnang wui ri dai bvun gvat ra dut le gi, shaushau lanyi lada gvo nyvun zhang sheq zhe ge le ga.

Chi xi bve eq qi anum wo nyvun zhang gi imyit ri zum zi wo dut mu myin ri yvupdvo gvilvang yvup ngon le.zhe yvang gi uwun wun、ulvum no 、myoqzhi migva gva、wum abo 、imyit tuqtak ga nobo bang bve nyvun ri zhe ge le ga. (Puqsu Zunwa Nangbang)