4. Waqsho byvisa

Waqsho byvisa sun ma gvat ze gi, waq shochui 250 ke, chinqing 150 ke, waq shogvuq 80 ke, waqsing 80 ke, waq bidung 80 ke, myenpijvi 20 ke, paihom 10 ke, pirang 20 ke, nvebyo 20 ke, dvingjeq 10 ke, angnam 20 ke, angtup 20 ke, chang 10 ke, piro 10 ke, shipyik 10 ke, izhum 3 ke, manmun 2 ke, pyikput mun 5 ke, pyiknyvun dung 1 cham.

● Waqsho byvisa sa ri zhumzo wing hi gai ra le:

(1) Waq shochui chizvan byvam mu munmun zhapnvuq dvo mai, myimut aucuq, auchuq ma izhvam ladvek zo zhvoqzvu mu, shomun gvat nvehui lui dvocham dvo. Haumai myenpijvi, paihom, shipyik, dvingjeq bve teptep shang chizhvoi lui, zvaizvai za qom hum hen dvo.Chang eq piro ri qekcheqchi lui nunu humnvuq dvo.

(2) Waqsho mun eq hum ge dvo e myenpijvi, paihom, chang, piro, shipyik, dvingjeq bve koq laqap ma gvat, izhum, manmun, pyikput mun, wuibu cham bve ri gejvo qom gvat mu, lvu nyvo zhang zhumzo wing dut be.

Zhumzo wing wo gai zhang, zhumzo ze dum gai:

(1) Chinqing zhvoqshoq mu wuibu cham ma byvungcham mai rangrang dvozvan san dvo. Haumai pirang, angnam, nvebyo bve shangchi hum dvo. Pyiknyvun dung ri chizhvoi dvo.Angtup cheq chi mu langcheq zhap dvo.

(2) Waqsing, waq shogvuq chizvan byvam mu shoyang yapse lui, jungjung za myije toq ma puq ri lviklvik gvut nyvinnyvoq mai, nyvamzo jvo bvobvo za hum ge dvo. Waq shochui chizvan byvam mu, yvam-yvam za hum lui wuibu au ma nyoqshoq zhvoqsat mai cezvan dvo.Waq bidung puq chizhvoi mu, nyoqshoq zhvoqsat zvam byvam mai abun bun gvut hum pyit lui, myije toq ma qopshoq nyvin mai cecham dvo.

(3) Hen ge dvo e chinqing, waq shogvuq, waqsing, waq bidung, waq shochui, pirang, angnam, nvebyo, angtup bve pyen laqap ma gvat mu, atoq ma pyiknyvun dung dvo zhvoi gvat zhang, zhumzo ze dut be.

★ Waqsho byvisa sun gai ri se ra dut le gi:

(1) Zhumzo wing sai e waqsho zhumzhum za e gunggvang shochui qin mu, munmun zhapnvuq ra le, zhap e zhe num zhang zhe ngvam.

(2) Shozhum byvisa sazo bang olvang:“Shozhum mun ma byviqbyviq zhvin e zhvinwing gvat zhang, hai nobau lvang wo sat byvam be”ga le, ngvut ri zhumzo wing sai e waqshoq gi, seng-ang rungwap mai zheplai wu gu e sho ri za lage gai le. Gaizo e kun, waq shomun ma byviqbyviq zhvin e zhvinwing gvat tang asam pyeq zhang sheq, zhungzhung zolyau ngapshoq gvat mu zhumzo wing gvut lage nyvozo le.

▲ Waqsho byvisa sun zo ngvam yung gi: Zora hima zhumzo wing naunau za lvu nyvo mu, pyiknyvun dung ngvamshom nam shoq tauzhum gvat lui, zhumzo ze ge nyvam zhumzo be.

Waqsho byvisa sun ngvamshom gi, zhumzhum nvamnvam, pyikpyik zhvinzhvin, man bobo za ga hom ngvam dik le.

5. Bushi byvisa sun

Bushi byvisa sun ma gvat ze gi, bushi 500 ke, chinqing 150 ke, waq shochui 80 ke, waq shogvuq 80 ke, nosing 80 ke, waq bidung 80 ke, myenpijvi 10 ke, huzvai haq 20 ke, banzvai 20 ke, waro myik 30 ke, shipyik 10 ke, angtup 20 ke, qunbu sun 20 ke, piro 10 ke, izhum 4 ke, manmun 2 ke, pyiknyvun dung 1 cham.

● Bushi byvisa sun gai ri zhumzo wing hi sai ra le:

(1) Bushi koq mu busho choq yu lui, jungjung za myije toq ma homshom nyvintoq mai dvocham dvo, cham zhang tungcum ma gvat mu tungmvun hen dvo. Haumai myenpi jvi, huzvai haq, banzvai, shipyik bve shangchi mu zvaizvai za qom hum hen dvo. Piro cheqchi mu nunu za gvut humnvuq hen dvo.

(2) Busho eq hum ge dvo e myenpijvi, huzvai haq, banzvai, shipyik, piro bve koq laqap ma gvat, wuibu cham gejvo shoq gvat, izhum, manmun ri gvat mu nvotnvot dut shoq lvu nyvo zhang, zhumzo wing dut be.

Zhumzo wing wo gai zhang, zhumzo ze dum gai ra be:

(1) Chinqing zhvoqshoq mu wuibu cham ma byvungcham lui rangrang cezvan dvo. Qunbu sun teptep shangchi ge dvo. Angtup cheqchi mu zvaizvai za hum ge dvo.Waro myik ri cheqchi byvam lui teptep sui ge dvo.

(2) Waq shochui chizhvoi mu bvobvo za hum lui wuibu au ma zhumnyvoq yu. Waq shogvuq eq nosing chizhvoi zvan byvam mu, ayang yang gvut humse lui myije toq ma nyvinnyvoq mai, bvobvo za hum ge dvo. Waq bidung puq chizhvoi mu nyoqshoq zhvoqshoq zvan byvam lui, abun bun gvut humpyit mai, myije toq ma qopshoq nyvinjvuq mu dvocham dvo.

(3) Zhvoqnyoq be chinqing eq hum ge dvo e waq shogvuq, nosing, waq bidung, waq shochui, waro myik, angtup, qunbu sun bve pyen laqap ma rara za gvat dvo mu, atoq ma pyiknyvun dung dum dvo zhvoi gvat zhang, ngvam nvo za e zhumzo ze dut be.

★ Bushi byvisa sun gai ri se ra dut le gi: Busho nyvinnyvoq ri myi ma a nyejo ra su gvut yin-yin za mai nyvin ra le, tungnvuq gvilvang zhenu zhe ngvam le.

Bushi byvisa zo ngvam yung gi: Zo ra hima zhumzo wing ma e zolyau bve naunau lvu nyvo mu, zhumzo ze ma e pyiknyvun dung zhumzo wing ma pyik ngvamshom toq shoq tauzhum gvat, haumai gaige dvo e zhumzo ze zhumzo wing ma ge nyvam zhumzo be.

▲ Bushi byvisa ngvamshom gi: Cucu pyikpyik bushing namnam za ga ngvamjing jing le. 《Zaizo zangsun gai paqzhvi buk》