(一) Nyuqnyun yoq zumgop kau mi dungko hozo paqzhvi

1. Nyesoq eq buibik qo gon ge

(1) Totho mai yuqgvo lo le u. Ho qo gvat e tang 5~7 nyi gvo gi laisoq a wang nvang, nyesoq nyiqui ri gi 25~28 mvak, myin ri gi 15 mvak mai a lai jo nvang gvut gvebyi ra le.

(2) Woyuq e mai dungko wo pyoq zo shoq. Xi u gi nyesoq lvoqmyvang byi ra dut le, bui myomyo zang lap nvangzhang, amyit zhe wo chin toq lawan le, haumu     ko-nui gvohing lo qo gewang bo le, nobau haubve fangge byi gvut zhang ge be. Gonzui ge ra gi jauzhi zumzo maubyi nvo za e maubyi, ngvop dvo e hiyvam nvo za e hiyvam byi gvut gonzui zhang ge be. Woyuq ding tang mai gi, maupong zhang nyiqui ri gi nyesoq 25 mvak mai alai doq nvang, myin ri gi 10~12 mvak gvo mi gvebyi, mauzau zhang nyiqui ri gi 20 mvak gvebyi, myin ri gi 8~10 mvak gvo gve byi, nyiqui eq myin le nyesoq 8 mvak mai alai shai nvang gvut migum dvo byi ra dut le. Haumai maupong zhang ngvop dvo e raurau hiyvam byi, myintang nyesoq 18~20 mvak mai laijo zhang raurau dum ngvop byi gvut ra le. Akau ma nyesoq 30 mvak mai laidoq zhang laisoq raurau ponghang ra dut le. Hau mai akau ma nyesoq coqcoq 5 mvak mai laijo zhang kisu gvut lvang nyesoq lvoqmyvang byi ra dut le.

（3） Shuzo yam. Dungko pyoq yam zhe zhang, nyiqui ri nyesoq 20 mvak mai alai jo nvang gvut gvebyi, nyesoq 25~30 mvak jiro mi gi dungko zhaq wo gvo lawan le.

(二) Ko-nui sairva byi qo

（1） Koshuq cuq. Ko-nui nui lo eq koshuq raurau cuqbyi ra dut be, tunggvoq zing cuq, a ngvutzhang yanyan zi gvut cuq yan byi, dvui eq ri ge dvui dvap le, dvui eq dvui dvap ra ngvutzhang jauzhi zum kau mi shamdvoq katzo hi lang ge dvo ra dut le, dvui hen dvo mu hinghing zi nui lo nvang zhang ge be.

(2) Ko-nui sairva byi. Ko-nui wo ban nui doq bum zhang raurau sairva byi ra dut be, Ko-nui sairva ri ayam mai nyun toq lo e ko-nui gvoq hanhan qom pyit byvam ra dut le. 10 bun a-o ma ayam mai nyun toq bum e bve banshoq qom pyit byvam ra dut le, haumai laidoq e gu gi 2 haq myit qo dvo mu a-nyuq kubyvam zhang ge be, hautang mai gi nobau eq zang kilaq e kohaq, myving lo e kohaq bve kubyvam gvut, hauzhang sheq laisoq zhe wo rot, bui zhe wo zvo wang mu dungko ri zhe ge le. Ko-nui chindvoq, dungko byap sairva byi ri, maupong buizhvoi e nyi napsun 10 qing gvo mai sairva byi ri sheq ge le, mauwo mauzau dvo le u a ge sairva byi. Ko-nui kohaq sairva byi tang mi nobau a wang ra midvu chi eq fangge ra dut le.

(3) Ko-nui chindvoq. Ko-nui chin hing toq lo eq koshuq mi raurau dvuidvap gvat byi ra dut be, ko-nui sanghi dvuidvap ri ahaq 30~35 liqmyi gvo bo zhang dvuidvap le, hautang mai gi 3~4 bun gvo chin hing toq zhang lada dum dvuidvap byi. Ko-nui dvuidvap ri myintang dvum ri sheq zuira dut le, ko-nui zang lvoqpyit ra ri son ra dut le. Gunggung ma kat wo ban chin hing doq bum zhang gi kobyap raurau dum sairva byi ra dut be, dvui eq chindvoq lo nvang zhang gi azo ngam gvut atoq qo shup dvoq gvat byi, shizui gvoq mi zang lvoq pyit ra son ra dut le. Gungung ma kat atoq mi zhe wo ban chindvoq gvat byi zhang, dvui yu qo    byvam mai atoq qo dum shupdvoq gvat byi ra le.

（三） Pun eq izhvam gvat qo.

（1） Pun gvat qo.

① Dungko gi woyuq e mai dungko wo pyoq shoq pungvat ra le. Wo ho yuq e mai dungko byap ri wu mu, pun 1~2 dam gvo gvat ra dut le. Sanghi dam gi woho yuq e mai 7~10 nyi gvo mi kobyap yuqgvo ding pun chang gvat byi ra dut le, pun gvat ri lamu mi Nyausu pun 2.5 qenkeq gvo a ngvutzhang punwing dut gu e Anjison-yefui pun, Cibaukang ga e pun lamu mi 0.2 qenkeq pyun gvat zhang ge be; Tangdam gi kobo bo lo zhang lamu mi Nyausu pun 5~10 qenkeq gvo gvat byi, hau zhang sheq ko-nui zhe ge dungko ri zhe zui le.

② Pyoq zo nam. Wo pyoq zo jvo bo lo zhang, pun eq izhvam shaushau zi dat gvegvat byi ra dut le,  pungvat ri hidvum shau, tangmi myo gvut gve gvat byi ra dut le. Kobyap kajvo ge e ri wu mu lui, San-yenfuhefui ga e pun ladam (N : P2O5: K2O = 1 5 : 1 5 : 1 5) 5 qenkeq gvat e mai, lamu 15 qenkeq gvo ge gvat le.

（2） Izhvam gvatbyi qo. Dungko gi izhvam zhaq shuq le, asu dum um gvilvang awo tang. Dviq ashi kun izhvam gimyvo a gvat cha, xi u       izhvam lvum bam myo zhang yvang e amyit dat bup shi lo le; Kobo bo lo e mai gi izhvam zhaq gvat byi cha be. Xi u izhvam aluq zhang dungko ri alvum zuibyi dat dut le. Haumu dungko yo mi anum izhvam bambam zi gvut byi ra dut le. Maumyi hui eq izhvam raurau chang gvatbyi ra dut le, izhvam gi wuihong mai she gvat, pyun gvat ri ge gvut le. Wuihong mai nemnem gvut gi a ge shegvat byi. Izhvam ban gvat tang mi yokau mi    dingnau dvo e izhvam haubve raurau pikshoq byvam ra dut le, a ngvutzhang amyit dat bup shi le.  （Puqsu: Goq Mutuq）