一、 Amyi qin ho

Meya myi qin ho ri myowu ra gi 3 qo bo le, laqo gi meya cham gvogvo momo za e qin ho, 2 qo gi agam myvap aleng bat lui gu e qin ho, 3 qo gi noqmai myving lui gu e qin ho gvut ra le.

二、 Yamyoq gve lui noqmai dvui

Joqmyo awang shi ma meya dvui ri noqmai dvui ra dut le, lvomo 10 qap lvotang mai 11 qap lvo-u ri wo dvui ri zhe ge le. Dai gvat zhang, mausoq ri wu, yo ri wu, hi ri ho dvo guq gi kazhung ngvut le, kajvo mi myving le ri wu, aqak gi guq eq meya laha dvui bvong e     aqing dat gve ra dut le, 3 nyi eq 5 nyi jiro zhe ge le, 5 nyi mai age lai doq.

Guq awo yam shi ma meya dvui noq zhang, yuq toq lo meya ri bui azang lvap, azo ri awo gvo zhvoi, ganze mi dvui zhang guq shu yam zhe ri azo awo yuqtoq zhang noq mai dvui e lazhvum abo loq.

三、 Gve lui sandvui

Azo kamyvo wo yuqtoq qo gi tangpyang lamu ma anvam toq ra eq senglvum le, amyi kamyvo san zhang azo ri kamyvo bo, sandvui     myozhang, yuqtoq e azo ri myo mu lvumsup lvum lui, laisoq awo wang, bui ri azang lvap, agam pingping za awo dut zhang, azo ri awo fa mu, joqmyo ri lai wui le, dvui e lvum shau zhang, azo yuq e ri shau, tangpyang meya nvam kamyvo zui byi ra ri awo migum.

Haumu lago gvemu sandvui ra dut le, hauzhang sheq yvumsing o-nau jvo lawo shu le, lajvin dvui zhang lamun gam woyuq ra qo mai chang lui, amyi zo kajvo yuqzhvoi, amyi zo zang nangsat byvam ra bve sonzhe lui lamu ma 10~12 kg dvui zhang gejvo be, hauzhang lamu ma 16~18 mun gam woyuq le, pun myo gu yotung ma noqmai dvui zhang ge dvui shau, pun shau gu mi gi lazvui ge dvui myo le.

四、 Yotung gon ge

(一) Dviq ashi ma gon ge

Dviq dvo ashi u ahaq dap lvuq, azo fa, amyit chin, abum bum lo, hau-u mi gon ge ra gi azo rara yuq nvang, pingping za yuq gvo ra qo, azo fa ra qo migum ge ra le.

Midung gon ra qo: A zhvoi yuq zhang sai dvui lvuq, sup e jo ma gi myvo byvam, azo rara za wo yuq ra midvu, yuq a zhvoi jo ma gi sai san lvuq, sup e jo ma gi myvo byvam byi gvut ra le, xigi wo dvui ong zo ra midvu ngvut le. Pun noqmai wo gvat byi zhang amyit wo chin lui azo ri zhe fa zhvoi le, ahaq 3 haq dap lo eq gi amyi ma bo dvo e pun ri ban shuq byvam be, ahaq 4 haq dap lo zhang azo fa lo u be, amyit ri chin ging mu, abum ri bum lo , noqmai pun gvat byi zhang agam ri pingping za, azo zhe wo fa. Meya nvam ri zhe wo nvam, dviq ashi kun pun san ri gi ahaq 2 haq myit dap lo zhang lamu ma Tan-an 15 qenkeq, Goqlinson-gai 15  qenkeq, a ngvutzhang (Nyausu 5 qenkeq eq Goqlinson-gai 15 qenkeq) gvut bvong mu gvat zhang ge be.

(二) Myvang lo, abo bo lo u gon lazhang qo

Xi u gi ahaq likdik gvo lo, agam myvang dvoq lo, abum ri bum wang lo mu meya gam ma man ri bolo be. Midung gon ge ra gi azo myomyo fa qo, gvo e kat raurau gvo myvang lo nvang, abvun ma e dviq e kat gi han zhang hup sat nvang, abvun ma e meya bun gvo hing myo ra fang, agam pingping zi gvo doq lo nvang, qanggom raprap rara zi, hauzhang sheq   laisoq ri zhe rot, bui ri zhe zang zvo zham le.

Gon ge ra midung gi: Gvo myvang lo, abum bum lo ra kun pun dat gve gvat byi. Meya dvui qo mi, gvo myvang lo kun le pun gvat  paqzhvi gi midung mo yvang ngvut le. Myo su gi sanghi bun gvo ding, 2 bun gvo hing lo zhang (Lvomo 2 qap lvotang mai lvomo 3 qap la-u mi) pun raurau gvat byi ra dut be, lamu mi Nyausu pun 5~7.5 qenkeq, Luqfajaq pun 7.5 qenkeq bi gvatlvuq gvut le.

Wuiwum wum ra qo fang: Guq shu tang mi dvui e meya yo, wuibum buq toq awo yui toq byvam nyvaqnyvaq dut zhang, meya ge qo mi zhaq langjvo le, haumu, wui hong lago she byi zhang sheq myigung  rangrang za, amyit ri zhe wo chin mu ahaq zhumzhum zi leng ri luilui awo leng.  （Aban shi）

(Puqsu: Goq Mutuq)