(Hida le atang ximai wucoq aq)

Lvomo 4 qap lvosik mi, shinggan ma nyesoq ri myvang lo be, xi-u ri, mau ngvop dvo zumzo ri hi byvam mai, nyiqui ri zumzo ma kum ri ponghi mu, lvoqcham lvoqhui, hauzhang nyigung nye mu pyikzo zhiten ra wogam le.

Totho ra hi 15 nyi mai gi zumzo hi byvam mu lui, sansan mi man nvang ra be, aqak gi shipyik zo ri shinggan ma mausoq eq zhe wo ra ra midvu ngvut le.

Shipyik zo yuq lo e 80-90 nyi zhe lo mu lui, myvangpyang 18-20 liqmyi zhe, agam mi ahaq 10-12 haq bo lo, agam mi abu zo bu lo yam zhe zhang, bong dvo e shipyik gam zo ri gawo mi ge      totho be. Samsa zo eq kut yu, dvui ge mai, yo mi ge totho be.

Loqzo 3 tung: Tot ho

Lvomo 4 qap tang eq lvomo 5 qap lvosik ma, ngvan ri ajo lo,  nyiqui le nyesoq ri 17 mvak gvo mi zhe zhang, shipyik zo totho ri zhe qak le yamyoq yvang be.Pyikzo totho ri gi maupong buisan lai a lo gu myintang ri, sai ge dvo yo ma aqo mi ho le.

Totho kun: Samsa zo eq yo qo mi dongzo hi du ge, lakong mi 2 gam, ayan 0.5 myi jvolvum, agam jiro 0.4 myi jvolvum gvut ho le, ho qo tang mi,lakong mi izhvam 2-3 da gvat le, lakong mi gvat le izhvam gi 0.3-0.4 shen.

Izhvam ban wang mai, myizve dving zi dum chang um gvat. Totho e shipyik zo gi lazvui dat shui lo le, xi ngvutzhang shinggan ma mausoq eq yvoyvo mai ra lo e zong ko yvang be.

Xi-u mi, buinyi 7-15 nyi gvo lo gin dvo le, gin dvo u mi nganvung ri rva lvuq gvat byi ra le, miyu mi 1 mu mi shipyik zo gi 7000-8000 gam ho ri zhe ge le.

Loqzo 4 tung: Yo gon loqzo

Lo gin gvat tang ma, shipyik zo ri shinggan ma mausoq eq ra mu, pyikgam zo ri yvo mai gvo doq lo nyi be, xi-u ma, yo ma e myoq lago seng byvam byi, shipyik gam wang ma lago um gvat ra le. Pyik yo gon ri aqak dik e 3 qo ngvutzhang：Abu cik, gvoq qui, asun yu byvam xigu be.

Abu cik, xi ngvutzhang pyikgam mi sanghi lo gvoq le a-o ma anyuq yu byvam le.

Gvoqqui, xi ngvutzhang shipyik gam yuqgvo lo e tang le tung ma, lvum       zhvap lvum zhang ga dvut gvut dut gu yu  byvam le, hauzhang rara zi wodut, laiwang buizang, shipyik zhe zui le.

Asun yu byvam, xigi shipyik gam sanghi lo gvoq le ma e gvo zvum mi zui lo e shipyik cham, pyoq byvam ra le, haumai agvoq xeqam xiqam mi zui e gi myvit qo dvo mu, duidui zui nvang, pyiksun pyoq byvam zhang shipyik zhe wo zui zhvoi le.

Shipyik bo bo lo e tang zo ma, 0.2% gu e Pungsha a ngvutzhang 500 dvu gu Linson-e-qinja 2-3 da bik ra le, hauzhang abo    zhvoi ashi ri zhvoi le.

Lvomo 7 qap lvogung ma, shipyik zuigvung bum lo be, xi-u ngvutzhang shipyik gam mi pun zhe zang shuq le u be. Pun raurau gvat byi ra be, miyu mi Nyausu pun gi 1 mu mi 15-18 gvungjvin gvat le, Jafui pun gi 1 mu mi 6-9 gvungjvin gvut nyvo gvat le,      izhvam gvat mauwo ra hi ma, pun gi ho dvo e shipyik gam agam jiro mi lvoqkong mu gvat le, ban gvat tang mi myizve eq dum ngvop gvat.

Shipyik hoqo mai gvolo le yamyoq ka-u ri, bau eq ngat ra ri zhaq gam ra le.

Abo bo u, ashi zui lo le u ma, 75% gu e Bejin-qingke-shixingfenji 1-2 da bik le, hauzhang shipyik ma nobau, Befen no, Tanju no eq Chongja no ri wo gam le.

Shipyik wang lo pyoq yam zhe zhang, 2.5% gu Gvungfu-ruyuq 500 dvu gvut 1-2 da bik le, xi eq Myenlinchung ga e bau, Yen-qin chung ga e bau ri wogam le.

Loqzo 5 tung: Shipyik pyoq

Lvomo 7 qap lvogung mi, nyuinyui gu e shipyik zui bum lo be, pyikgam ri gvo lo, xi-u gi gaizhang mi wu mu, shipyik nyui lawam ge pyoq ung be.

Lvomo 7 qap lvotang eq 8 qap lvosik ma, shipyik gam mi zui bum e shipyik ri yvoyvo mai ne bum lo be.

Lvomo 9 qap zhe zhang, pyikmyving pyoqzo yam ri zhe lo be, shipyik xi lafa ho ri 3 da yvang wo pyoqzo le, l mu mai pyoqtoq le shipyik gi 2500 gvungjvin gvo bo le, pyikmyving xi ri lawam gi ungzo,lawam gi ge dvojvuq le.

Shipyik pyoqyu mai gi pyikgam ri ge nut be, nut e kun dimo age zhiten, hauzhang tangda dum ge chung le.

(Banbe)