Xi jiro, Yinjang ginwang Zhanxi mauwa Galau wa bum zhvunggoq ma zhoq dvo e dungyo laqang ma lo lam wu gvun bang zhaq myo ra. Dungyo xiqang gi gokun Zaizo wui  biji nyve lui dungguq dvuizo lo e azong roq gvut shit dvo agvo. Haumu hau zhiwo ma e mingbyu wui layuq eq layuq ri daijvo lo, o wo jo o zhvitmyit jo bo gvat mu, azhum zhum amoq moq gvut shidaq lung lvum mu lui lo lam wu gvun agvo.

90 zan byvat ma shi-ngai e qanglu gva su Zhvin-yu Konglum gi, dviq shi kun dungyo ri chang qit myang wu lui, dungyo ri zhvit e myit ung gauguq ma bo nyi ra. Yvang ga ri: “Dviq shi kun, ngo yvup mai bun lo eq myoq pong gvat zhang, anu eq awa builvap zhveqzhveq gu e ma dungyo zhvat myoq nyi lang gvo e.Dungyo ma guq dvui dvo e mai laimu lui, zvap、yo、lungbum、mui、lik、manggong bve guqzo muilvum ngap shoq zhvat ho bum gvo e. Haukun layvum bang zo e guqzo muilvum, howa nuqpyi banshoq gi dungyo hau qang mai zhvat ho toq lo e, asu anu eq awa nyiwui buibu buinoq teng zui gvilvang, layvum byu luqzo myvo za zhvat wo zuitoq gvo e”ga.

Zhvin-yu Konglum gvo lo e mai, nyiwui yvumsing bau dungyo hau qang ma gvap e lang、 zho e lvuq、 dungko e pyoq、giyeng e bvau gvut muzui  uzhvang e nyi ngon gvun,       nyigung dvu shoq shoq zang nyi nan gvun mu zomut lo zhang gi, hau yvang ma pyoq e pehum   zhvoq angvut zhang dungko nyvo lui yvum mai wun le e zangjeq pong zo ri ngvam dik be. Wamlai luq e mai, yozang ma dum leq yvup gvun, nogoq toq mai laizo hik lo zhang chamcham za ga nyi ngon dik, guqbo shom homhom za ga lo e nvoyu yu gvun,  byizo munu wui eq yuqzo lanu wui zhi yau yau gvun gvo e kunngon muku te jo gvat e mai yvupmo myi gvun dvo be. Myintang buiwang zo ma muzui loqzo mai byu wu gvat zhang, guqyo bumgom shing shing nyui e guqhaq toq ma hing su duqbo e guqnvam nvam kang bum e myang gvat mu, byu eq cangpun maumyi chom soi toq e sumla long su wu zhvoi dik be.

Byvatcik liklai zhang, bummau mingbyu wui e igvun ri liklai ge bum be mu, ori dungyo agvut zo bum loq, ngvut ri zhvitmyit abyuq mu dungguq lazvui lazo byincheq dvui bang ri bo ashi ngvut ra, haumu sheq  qanglu gva su yvang lalo myang dem qo yu e ngvut le. Gege ri, byvatcik lai lo zhang dungyo gvut zo byvat ri dat tum lo byuq abe, ngvut gvi- lvang biji nyve mu dungguq dvui zo lo wu e Zaizo amyvu wui mai dai gvat zhang, dungyo gi dvo myvi adat e mizving ko yvang ngvut le.

（Zhvin-yu Konglum  Lvuqsing Lanu）