Xauqung eq Zhvenni gi chuizo kubau rung mi laha nyi gvo lo gvo ngvut le. Yvang nvik gi yvumsing wupzo eq awo ganglvum ja yvang zumngon lvum dik e byinchang ge ngvut le. Akui yvangnvik gi Gelin ga byuwo eq tuq girum dvo a-o ma Manha dun ga zhiwo mi zhongmo doq nyi agvo.

Xauqung gi laban nyi kangmo Nyuyve ma byuwo wa mi e mu Zhvanmusi xensen ri laigva long e-ngvap jvo gvun, mvomyi e-ngvap jvo gvun, dang nyo byinchang e gvut gvun gvut ra. Zhvenni gi gai qo kat tung-      zhvun mi pong dvo gvo e gapyi shuqgvun seng ma e kihot dong yam zhau e dvangkuq mi e zung gvun dvo mai, gapyi shuq gvun i-zhvang laigva e wugvun nyi mu, Xauqung ri e lang dvodvo gvut ra.

Dangdik lo daigvat zhang，Xauqung gi deguk mo dut gu e Zhvanmusi xensen ri la- zvui ri a ngui dik, asu e apau myvang e mu xigi chuizo kubau rung mai ho byi e mu dut lui awam he shirang zui nyi ra, dum ngvutzhang Zhvanmusi xensen e zhunzo Yvehan dum ngvutzhang myoq mi dap ladvung e waqngan zo dum ngvut mu, Xauqung gi haq wu zhvit nyi be. Xi jiro dum ngvutzhang waqngan zo xiyuq eq Xauqung ri bvambvam tu gu e sum- zvoq mausau buk labuk lvom dum gam byi gvun mu, Xauqung gi Yvehan waqngan zo xiyuq ri zhe haq wu zhvit nyi be, asu e yvang e zhvitqang xi gi o ri lvang awam dai toq jvo, yvang e byinchang ge mo Zhvenni ri dveng awam daipok toq jvo.

Lanyi ma gi Zhvanmusi xensen nviknyo nvikdvat gvut Xauqung ri sheq ajvang dum yu toq shit nyi be, Xauqung gi mangzo deguk mo xi shinggan mi laingam zo toq hik cham gvun nau mu gidvuq lo su ladat ngvut le ga myit mu, myi lvang amyi gvun za yvang zungdvo lveng dvangkuq zhvun lui shinggan shut shui so toq lo be.

Sansan za builoq bik zhvoi dvo shinggan mi zhe e mai Zhvanmusi xensen nvikzhum yo go nyi e imyit num lo nyi be, dai zhvoi jo dik e zoshang zo ja Xauqung dai jvo gvun e imyit dang noho ho mu yvang jo nan gvun nyi be, Xauqung dai e gi: “Byuwo wa ximi nyi ri ngondik ngondik be, zoshuq wutbu hai ri a u-qi ra, nyi kangmo yvumsing zhe zo nau e chuingvam ze a ngvutzhang nyenye za woq-u shatang dum myangzo gvat, zhe aqak gi ngo ri zhong tuq dvoq nyi e Gelin xensen ri xi kayvum milaq dve lung dvo ri kai o......”

Zhvanmusi xensen Xauqung ri dang lat pyit mu myi lo gi “Gelin xensen gi oyuq?”

Xauqung dvudai jvo e gi: “Yvang gi ngo ri zhong tuqdvoq nyi e byuwo mo layuq ngvut le, asu ngo yvang ri kinvam ri amyang wu shi”.

Zhvanmusi xensen dum myi lo gi: “Nang su zoshang wui zhaq myo agvo luq?” Xauqung dvu dai lo gi: “Myo dik be, myodik be, akui mai ngo gungzo wo mu ngun wo zhang ri wuidvo shodvo e zoshang wui ri myomyo girum ra, Zhvanmusi xensen nang ngun hau myvo wo gu nving......”ga zang dai wang lo eq dai myo gvat be ngvut ra ga myitbun dang lo mu awam dai jo lo loq.

Zhvanmusi xensen “Hi”ga advam dik nvo zi gvut dai lo gi: “Ngo girum toq gvat ngun zoshang wui gung migi kimyvo wo zhe wang ra yu angvut, zhe myopyang gi byu lawam e butung misheq wang yvam lo bira    nving, xisu girum zhvitmyit bo byu ngamoq agvam gvut ga dai lui, ngo myung be, ngo ri rau zhvun dvau lo laq koi ga dai dang lo be.”

Xauqung gi hai ri awam sai dai toq gvat loq, imyit dang dai e gi mangnyvung mang xi girum tuqbang imyit yvangmyvo zilvang abo ngvut ra ga.

Yvum dvau zhe lo mai Xauqung gi mangnyvung mang xi ri zhiqang laigva latung lo ngvap jvo gvun ra hen mvau be, asu gi ngvap hi toq gvat eq zhang mangnyvung mang ngilang nyvung gvat mu dai lo gi: “Nang sumzvoq zvoq be angvut luq?”

Xauqung dvu dai jin lo gi angvut angvut ga, mangnyvung mang myoqzun zo eq lamyoq wu gvat mu dai lo e gi: “Ngo sumzvoq shom wo nam jo gvat be”.

Myintang zo zhe lo mai, Xauqung gi gang toq lo bira hen mvau nyi le ma, mangnyvung mang likdik dak ma sidiq diq no buq no dang lo mu, soq she wui le gvut lamyoq dong e dikdik me dut dang lo zhang, Xauqung gi byo mang wu dan le dut lui, byu qi modo wut zhvinvan lawan wan batbyi gvat mai, Yvehan rire jinjin shit jvo gvat be.

Chirung mi mangnyvung mang ri ban pyai ge dvo mai, Yvehan gi Xauqung ri zhong qo e de gvat ra, gang lvum bira kun Yvehan eq danlo dandvan mi Xauqung ri myi e gi: “Nang ngo ri azhvit lvu o ”ngvu ga, Xauqqung gi jo dan le niknik be, asu e u-ngut gi zhvoi ngut dik be.

Yvehan dum dai gi: “Xauqung e, ngo ri nang ri zhvit dik be, ngo lazhung son dvo le, ngo akui Zhvanmusi xensen e ngunze banban zui zing dvo le, nganvik ngunze xi kau waq chung lui, wewe pang yvam goq”ngvu ga.

Xauqung juqdan na shi mai chizut zut dang lo mu uling he le gvut dai lo gi: “Ngunze kauwaq chunglui pang goq laga gu e age age”ga. Haumai Xauqung gi nyi wui dik be, yvang gi Yvehan eq lvu le pye kun ga ki    myvo lalang myit nyi e, akui wolang lo e dang gi hoq shi ladvung e dang zi dut lui yvang gi nvikzhum ashau yo lo nyi be.

Yvehan gi Xauqung gidvuq dang lo    myang e mai wui le gvut dai lo gi: “Nga zhvit e! ngo akang asu ngvu dai e gi nang ri haq  zhvam wu e la ngvut le. Nang ri se dvo be akui byvat le myiwe zo bve gi alu gu myangzo myangshuq e byuwo bve yvum mi zi lalo nau bum le, ngazhvit nang gi xisu byu a ngvut ngvut ra, imyit shop dik dingman dik be, haumu ngo haq gibu dik be”ga.

Xauqung gi mu xi datshin byvaq lai lo su ga lui jo dan le azhing byuq ra su ga le dut gvilvang, yvumsing wu e byu awu shut ngvut ra ga zhaq gibu dik be.    (Aban shi)