Wakau ma myoqzhit mang layuq nyi ra, dviq ashi kun mai yvang myoqzhi zhit byuq be, haumu wakau bang ori yvang ri atang myoqzhit chom ga agvo. Atang myoqzhit gi zhong ri a myang doq wu, kizan zhe zhang gi asak 50 zan myit bo lo be, xiyoq yam he misheq zhongdoq myang e be.

Xi nyi napsun ri atang myoqzhit yvumkun mi buizvo nyvin zung gvun nyi ra, wazau rot le lo mu atang myoqzhit ri mu lamu wo shoq yvang le girum laq ga le dai be. Atang myoqzhit jomau su ga mu myi e gi: “Ngo su myoqbvak mo, haimu zilvang awo zui nving, nang ri hai wa le wo girum ra dvi?”

Wazau dai e gi: “Toq mai byu pyai nvang gvat mu wakau mi makzhvok ho zhimu mvoqbvan pung lo shui pong nvang dvo agvo, mauwa upzau ngo ri wabyu shaushau lvang 50 yuq gvo wutzving mu, zhimu mvoqbvan pung mi le bolom nvang ra dut le ga aming qo byi dvo ra. Zhongdoq yam rau ban zhe be, ngo wabyu 10 yuq gvo yvang ho wut zving ra la dut dvo ashi, nang ri layuq son dvo be ga.”

Toq mai xisu gvut byu pyai nvang gvat lui wakau mi zhimu mvoqbvan pung anum lo shui pong agvo, asu e mvoqbvan pung ga mvau gvilvang bvanlong lalong gva lang jan mvau dvo mai datbung 2-3 qap chom bat lvum mvau eq gi ban be. Mvoqbvan pung bizhe lom e wabyu aqing 10 minit gvo e jo zung mvau eq gi buinyi jopau 50 koikoi myang yu zo lo be.

Atang myoqzhit mang gi xisu mvoqbvan pung mi noqmai bolom wu nau be, asu gi o ao gvimu abi myang lom wu, xida gi wazau yvang yvum mi lelo mu le zhi lui, yvang gibu dik be, wazau ri ajvu lvang zhaq lvom bun ra. Wazau yvang ri sansan dai san jvo e gi: “Atang myoqzhit e, xida le mvoqbvan pung gi higu le eq aqum loq, shaudik lvang nali 2 qing gvo zung jo ra dut le ga, mujo pau ri 30 koi zi la byi alo ga.”

Atang myoqzhit mang likdik mi myitbun dvang gvat e gi, o, wazau wa byu ho lvuq wui e gi xisu mu la ngvut ri dvi ga. Ngvut gvilvang atang myoqzhit gi muzui wo e su yu a ngvut mu, nali 2 qing zi e bi jozung dvo ri 30 koi myang yu gvilvang imyit zhaq ngon be. Yvang kondok yu zui lui, myigung mi taubat so bi ra hen lo zhang, wazau lvom shap dvo lui dai e gi: “Kondok eq tau jo so mu e ri o dat ge ra, sira lamyoq eq lvom wu gvat eq zhang nang gi myoqzhit ngvut e lvom wu se bira.” Atang myoqzhit gvutwui dik e su ga mu dai lo gi: “Akun kondok eq atau jo so zhang ngo wapung zhe kisu gvut awo so zhe e gilvu o.”

Wauzau dai e gi: “Nang nga butang mi chang zui dvo aq, ngo shui e le, zhong ban doq zhang ngo dum le de gvat ra ga.” Atang myoqzhit gi dang hauzi lang jo nyi su be, haumai gi wazau bu mi chang zui zing dvo mu kum mo dong shut bi so toq lo be. Wazau laqo tang e zhvinvan bat le gvut wabyu ri wapung mi zhimu mvoqbvan zhongdoq rau le gveq ga kat qut nyi ra.

Lazup mizhang atang myoqzhit eq wazau wapung mi so zhe e begvo, wabyu lawam ri lagon lalang dvung gvut so le lo bum begvo. Layuq yuq gi atang myoqzhit ri nang ri zhongdoq le lve luq ga puq le gvut agvo.

Wazau atang myoqzhit ri le puq bang ri danglat pyit mu dai e gi: “Dang dai ri pau dvap dang dai shang! kinyi gi yuqkang mo yvang ri tanglat zi chom ngvu shang! Myoqzhit dang age dai toq, kayuq zang dai toq zhang gi kayuq e mujo pau yubyvam byi ra ga.” Haumai gi kayuq ri atang myoqzhit ga adai lagvo.

Wapung ma zuppong wap ri zhonggok byam lvik gvut gvat begvo, zhongmvoq sira gi noqmai zhonggok kau mi le zhe nyi dvo be. Wazau gi wabyu ri zhonggok kau mi qom kat lvung gvat be, atang myoqzhit ri gi bvong dving lakat eq mausau labuk byi gvat ra.

Atang myoqzhit zvikza eq haqmyi e gi: “Ngo myoq dum zhit laigva adum se xi waq mu hai gvut ra?”

Wazau dangsoq haq soq jvo gi: “Nang e myoqzhi gi a myang gvilvang wo pong le, ngvut gvilvang myoq azhit bang eq alvum qum, haumu zhong doq nyi kun nang gi sira dai e chang gva mizving nvo zigvut ulvum dvau ngop dvo mu jo zung dvo ra dut le, zhaq zi a ngvut rigi ulvum kidvu ngvang, sira eq zhe myoqdong lazvui lvang kiwu dui lvum.”

Atang myoqzhit u-ngut ngut mu dai lo e gi: “Akun zhang nang xi mausau buk mi laigva cham summyi yan bi gva dvo shi aq, sira lo wu kun byvoq lai ra midvu o ra.”

Wazau dai qeon lo gi: “ O, nang gvum myoqzhi zhit gvilvang hai lvang dat myit zhe ri mvai ga.” Haumai mausau buk ma sanghi qap mi makzhvok ho zhimu zhvum ga tem gva byi dvo be.

Wazau yvang yvumsing yvang atang myoqzhit ri zhonggok kau mi shui wang e mu, sira eq alvum myang lui nvo za tung zhvun mi e zung nvang dvo be. Ban ra zung ge nvang tang ma wazau gi sira ri rau mvoq aq koi ga dai be. Sira zhonggok kau mi zungbum e zhongzo bve ri ngvap wu mu dai lo gi: “Byuce yuq gvo azhe le lo shi gvimvai.”

Wazau dai e gi: “Hau bang adat lelo loq, rau la mvoq byi aq koi, za a ngvutzhang xibang lvang dat lo byvam byuq ashi ga.”

Gege ma ri zhongdoq e ki myvang abo shiq ma, qitong e nau ra ga byvoq mvau mu zhonggok mai so toq lo byu bo be. Layuq eq hi shit dvo zhang bichang so toq lo bang zhe myo lo su be, ki myvang abo migi toqtoq wangwang dut bum lo be. Xisu mangkoq ri sira nvikzhum wu yo dik mu, zhongmvoq e dvo no gvat mai yvang nvikyo go lo be, asu ri ajvu gi alvum toq.(Aban shi )

（Puqsu Doqshi Labau）