Ngo Zaiwa laigva bi mvoq hi gi, 2023 zan 11 qap 7 nyi mai, haukun ngamoq Wuchalu ma e po- myvi wui huizup lvum gvun zhang, Zaiwa mikon chom kon ri sheq, laigva se bang gi laigva qap ma wu dvo mu kon shit gvo, ngo yvangmoq ri misa mu yvumsing mying laigva bi se nau lo e, hauzhang Muipuq Dvomtang sira yvang Zhifuqin Zaiwa laigva mvoq wap 9 gok ma sira gvut nyi le, laigva buk azhe byi le, mvoqpau hai ri a dung, rau le bi wang mvoq gveq ga mu, ngo hi bi wang mvoq be, tangma zum ngon byinchang 2 yuq dum chang wang le gvo mu, ngamoq 3 yuq Zaiwa mikon dat wu kon shoq ngvu bi mvoq shigut be, sanghi ri ngamoq laigva myvi zi lvang awo mvoqse lui, amrveq mo ga ngvap wui dik, ngvut ri sira Muipuq Dvomtang, Mutuq Gam, Lapai Dvom bve nvik-u nunu mai, nungmoq sanghi za la mvoq e, xi-myvo dat ngvap zhang zhaq ge be ga, loqmo cham byi le, banbo zo byi le gvut, nvikshi daitong le, wum-o daicong le gvut gvo mu, dum tot cuq e Zhifuqin Zaiwa laigva mvoq wap 10 gok, 11 gok, 12 gok ma dum chang wang mu, sira bve dai gvo e wuiwang wang ri simui wo jvaq shoq ga dong mvoq shigut nyi le. (Gvasu: Pauqi Mudvom)

Ngo gi Mangshi myuq Wuchalu mauwa Wandan wapung Paho wa mai nyi gvo lo su layuq ngvut le, kizan asak 68 zan bo be. Ngo zhong ban doq tang, Zhunggo Ren- myin Yinghang ma rungmu zui byu bi gvut lo e, asak ngaq lui rungmu qutno tang ma, ashu 2 yuq shui gvo uzhvang mangzo gvut nyi gvun dvo be, asu gi byinchang wui eq laha kaka toqlam huizup lvum gvun zhang ma, byinchang wui gi Zaiwa laigva ma wu dvo mu mikon kon ngon jvo shit le gvut gvo mu, ngo ri yvumsing mying laigva bi se nau lo e. Haumu, Zhifuqin Zaiwa laigva mvoq wap 10 gok ma bi wang mu, Aa, Bb, Cc, Dd, Ee, Fa, Gg mai bi mvoq hi lo e, akui ngo yvumsing mying laigva mai dvong dvo e Zaiwa mikon eq longsan laigva, mvomyi laigva, zhiqang laigva bve dat ngvap be. (Gvasu: Pauqi Mutoi)

Ngo gi hekun mai Wuixin jamzan ma Zaiwa laigva zhong doq agvo ga e wo jo mu, zhaq bi doq nau gu e, ban mang be ma awo mvoqse lo kai ngvu, zhonggok ri awam bi wang mu e, ngvut ri ngamoq Wuchalu ma laha nyi lo e byinchang Muipuq Dvomtang sira eq daijvo gi, zhongzo banshoq gi mangzo wui zhvat la mvoq lung bum le nving, rau le bi doq aq ga shui hang yu mu, 2023 zan lvomo 11 qap 7 nyi myin le 9 qing mai Zhifuqin zhongwap 9 gok ma bi doq hi be. Haumyin le sira bve: “Zaizo Zaimying mu, buiban buishut hu, Zaizo Zaiwa laigva se” ga le mvoqjvo gvo e, ngo akui zhe no ma bo dvo ra. Sira bve xi-myvo ngonngon za ga teptep dat mvoq gvo mu, ngo haumyin mai manggo no atoq ra midvu kilvang ngvu bi doq lo nyi be. Haumai zandu lawui zang mvoq zhang, Zaiwa laigva mvoqhi buk ban mvoq mu, ganzhvam shui zhvam wu begvo. Haukun ngo laigva gva zvum gvajvan ri awo mvoqse shi, ngvap gvi lvang atung ate ga zhaq ngvap wui shi mu, Zhifuqin zhongwap 10 gok ma dum bi doq, hautang ma gi la- dam doq wu gu zhongzo ga 12 gok ma dum shui doq gvo e. Akui ngo yvumsing myvuzo laigva se zhang, sira bve gva toq dvo gvo mvomyi laigva dat wu gvun be, byuze nvik ri zhe dong lo e su ga ra. Haumu ngo ri yvumsing myvuzo laigva mvoqse byi e sira bve ri ajvu bun dik le. Sakram zo wui, yvumsing myvuzo laigva ri zhvatdap mu, lago rau bi mvoq chung elo gveq, sira bve hai apau ri ayu e nvik qik uyung zhaq gvam mvoq se byi agvo ngvu ri daibvun gvat nau ra. (Gvasu: Muiho Paudving Lat)

Zaiwa laigva gvam shigut dik e awvoi mangzo ngo gi, nganvung myvuzo minggum mausau long, dangum shise ding zhoq lo e, myoqzhi eq myang gvat, noqap eq wojo gvat e mai, 2019 zan lvomo 12 qap 3 nyi, Zaizo zhvitmyit zhong nambat 39 gok ma bimvoq wang lo be. Zhvitmyit zhong mai doq ong toq lo mai gi, nyinyi buibui shigut sheq shigut mu, yvoyvo mai labau mvomyi bve datngvap lo. Asu mu sira qeon zhvunghuq ri myomyo myang yu be, qeon zhvunghuq zhe myang yu zhe gvam shigut. Tang amyang ma gi Zaiwa 《Myithui lai gva》 long ri dat bidin wu be. Ngo Zaiwa 《Myithui laigva》 long din wu e aluq lace zan myit bo be. 《Myithui laigva》 long labat lada myangwu zhang gi, mingdan gunzhvung paqzhvi lusik, ginwang myuq kangmo dang lusik lvommyang wu, haumu nga imyit unggau guq ma myitkum lvang zhe bong lo su ga be. (Gvasu: Lapai Nangjong) ZAIWA LAIGVA GVAM SHIGUT DIK E AWVOI MANGZO NGO