Wap ma lusik Lvomo 9 qap 14 nyi ri, Sikung mau 2025 zan zantang jesik kilum de gvat zuppong eq“Yvumsing mingdan ri zhvit·je moq lvoqgvung gat”mingsing mingzung midung dangwang mvoqshit zuppong pong agvo, hau mi gi jepung wang lo ra     jesik jezo bve ri kilum de gvat agvo. Mau wapdoq fushuji, Mau wapdoq kojvo rung rungzau Sun Jeq gi zuppong ma zhe lom lui midung dang le dai ra, Sikung jedap           silin-yen Lin Jun gi jewang dongbyi aming qo laigva le ngvapjvo ra. Mau wapdoq anum muwun suwun, Sikung jedap upkang dvira suwun Ma Fuxin gi zuppong zhvung mu zui ra.

Sun Jeq dai ri, Sikung mau gi bvunlai zhiwo lawo ngvut le, byvatbyvat daidai Sikung mau ma e zowui mingdan ri zhvit myit ma bo lui, zhvitgvang eq mingsing mingzung qo ma niknik e Sikung bvunlai        kodvong dvo le. Haumu jesik jezo bve gi yvummau ri migum mingdan ri zunghung myit bo lui, ganzvang myvang e upkang   dvira myit eq nikdik e mingdan ri zhvitmyit toqshit bum be, xibyvat ma Sikung sakram wui e wunwo wun ge shittoq dvo be. Banshoq bang myitngam myitlum myitging lui Dang e dvunshit qo chang e je ge gvut; Mirai wum-o bo man lui je datbik e je ge gvut; Ge e laijvang gapcoq gapnang chang jo lo lui zhviwvoi mingdan mingbyu ri wum-o toq mu ajvu dvau e je ge gvut ra le ga.

Ma Fuxin dai ra, jesik gi Dang e dangjo ra le, jemoq lvoqgvung gat qo mizving dvo ra le; Azhung zhung e qinglvum juqwam mu eq myoq eq ngiqum wam      hulvum ra le, wuiyak nyizhang mai je ge gvut nyigvo lo ra le, je gvut myoqdong arong yu toq lui jemoq lvoqgvung gat muqo ma wum-o bi toq byi gvut ra le ga.

Yang Dvarung gi sirve gungtai gvut jesik zo bve ri myitwum byi dang le dai ra, Li Xang gi jesik gungtai gvut, Lyu Zudi gi jesik mowui gungtai gvut dang le dai agvo. Jesik zo bve gi yvummau byu e kilum dang jowun chung lui myitngon ngon za jepung qo wang lo begvo, yvummau ri migum   mingdan ri zunghung qo sik so wang lo  begvo.

Li Fui, Li Chon, Sung Yifa bve zuppong le bilom agvo.

(Puqsu: Muiho Mugvai)