(Byvung mai yu e datbung)

(Hida le atang ximai wucoq aq)

Lawam zhe qitong e tang mai zhonggok ri awang lo zvik la gvo, sikmo zing wang mi buishum kau lui nyvabvok bvok gvun    izhvang bviming e ming zung gvun nyi begvo. Wazau byurvon xibang ri zhonggok kau qo e kat hang gvat lui dangmak mo dai e gi: “Zhonggok mai dum so toq lo gvi rigi mujo pau abyi loq ga.”

“Izhit nau gvilvang age toq e dvi?”ga myi bang ri bo ra. Wazau myoq gi munmun gvut dai dang lo e gi: “Ki myvo zhit nau  gvilvang zhan dvo gveq, adat buq goq lo ga.”

Zhonggok mi zung mvau bum gvilvang sira mvoq byi e zhimu lago jo byu gi layuq ri a bo. Lvunglvang bang makzhvok ho zo qo rigi wum ori ajo zuq, mvoqbvan aqing rau ban mu mujo pau 30 koi rau lvu wo yu zo lo kun ga zi lamyit bum a lo.

Atang myoqzhit zi lago lajo zung dvo ra, yvang gi wazau dai e dang jo mizving dvo lui sira zhvang a lvum wu gvat zik, ulvum dvau ngop dvo mu, gva mizving laigva gva nvo zigvut zung mvau dvo be. Sira lvang ban dai lo be ma, laha bi zung dvo su eq abun dvo mi zang dai bvun jvo gvat e gi: “Tanglat e, hau nang e bvongdving azvung lvang a nut byvam shiq ngvut rvo.”

Atang myoqzhit bvongdving mi sop zui gvat wu zhang gege ma ri bvongdving mi  azvung gingging lazvung dvo ashiq. Yvang bvongdving azvung lawan wan nut dvang  byvam mu, laigva gva nvo zi gvut yvang dum sai zung gvat zhang, yvang eq laha zung su eq nvowui wui le gvut dum dai jvo lo gi: “Zhong jo be o, nang a-nyen lo shi dvi?”

Atang myoqzhit hoq lvang zhe toq ra ga yvang eq laha zung su ri kumdong shut zhvun dvang gvat mu dai e gi: “Toq lo aq, toq lo aq, nang mying myo ra.”