Wap ma lusik Lvomo 9qap 22nyi ri, Sikung mau amyvu zhaunoq mugon rung mai Sikung sira gvolik zhong mi nganvung Sikung mau amyvu laili gungbyvan paqzhvi mvoqbvan pung shui pong         agvo. Maugom zhiwo kangmo dviqzvang zhong 16zhong mai zhe lo e sira bve 20yuq myit, seng-ang gungbyvan paqzhvi lo myang mvoq- bvan chung agvo.

Xida xisu gvut mvoqbvan pung pong e midung lazhvum gi, maugom ma e amyvu kangmo mingbyu wui laili gungbyvan mu zhe wo minghui lvum, zhe wo coq chung ge, zhe wo shirong zhvoi mu, Sikung mau amyvu   myithui muzo ri zhe myvang ganzvang wo doq e mai lai lui, nganvung mau amyvu laili muzui pung bve ri wo sai gvo kik lo, shau dik amyvu zo wui e laili gungbyvan mu atum abyuq wo migum zuiring lo ra midvu ngvut le ga.

Mvoqbvan pung mi Sikung sira gvolik zhong ma e Fu jaushu Zhau Qisen ri zhi yu lui, sira wui ri laili gungbyvan kingze chung mvoq nvang e mai, dum qing lvum nvang le gvut mvoqbvan byi agvo. Zhau Qisen sira gi shau dik amyvu zo wui e laili gungbyvan mu xi akui zhe shoq kisu wo coq chung jo lo qo, akui kajvo zo gvo wo zuiring nyi le qo, tang- pyang kisu gvut sai zuiring lo ra qo bve hi qom daikoq jvo lui, yuq kangmo ri gungbyvan kingze dum chung mvoq nvang ra. Haunyi mvoqbvan pung mi zang chung mvoq gvo e gungbyvan kingze gi shang du, qizvung zhang chom zvung so, qiso so qing lvum, lai bek,  myium mut, shului lui xi bve 6myvu bo ra.

Sikung zhaunoq mugon rung bang gi, mingdan mai misat toq dvo e amyvu tungzam kat kangmo mi wo chang zui ge shoq ga mu, 2020zan mai Mangshi myuq Xishan mauwa Banggai wa mi amyvu laili gungbyvan kingze sai zhang lo wo cuq dvo bigvo. Yinjvang ginwang Zhanshi myuqwa Yilungwadi wa mi ngvut zhang, lai sai zhang lo wo cuq dvo bi- gvo. Kizan le lvomo 8qap zhe zhang, qizvung zhang 1203zum, lai 20pu, woqgan jap 66lvum, zingdvau 15lvum wo sai toq lo lui, Mingmau amyvu dviqzvang zhong, Lungchon amyvu dviqzvang zhong bve 16zhong mi     zhvunghuq gvut wo qom gam byi bigvo ga.

（Muran Maroi  Goqlu Mutuq  Lapai Zharoi）