wap ma lusik 2023 zan lvomo 12 qap 30 nyi ri, Yinjang ginwang Zaizo amyvu e laili byinpye pung nambat 6 cik nambat 1 dam e gungtai zuppong mo ong zi pong lai begvo. Asik cik suwun pung ri qin toq dvo begvo.

Lailo be 5 zan gu ma, Yinjang ginwang Zaizo amyvu e laili byinpye pung mai ongshi zhaq wo zui toq begvo. Laili byinpye pung mai Munau zumgo laili coq zuiring lo qo, myingzum laigva mvoq e lo qo, amyvu byugat mvoqbvan toq qo, mikon mingui toq qo bve mi diqa wum-o wo gvat toq begvo; Zaizo amyvu e diqa laili muize lago coq migum jo lo begvo, Zaizo amyvu e laili coq zui byu lafa wo mvoqbvan toq begvo, mingzvang e diqa laili muize --Zaizo poqhaq zangbo bve diqa laili muize mying lafa wo dung myving begvo.

Asik cik pung up zau Pai Jenfaq hap dai ri, tangpyang 5 zan gu ma, byinpye pung amyvu laili eq jvetshop imyit coq chang qo lago shui gvut ge lo ra, zhe ge tungking amyvu laili qikqik shui coq zui jo lo ra; Amyvu laili lago sai shui ho gon yu mu, lago shui byvo chung jo lo ra; Yomu zuimau zuiring dvoq qo mi bi nvikqik lui, Zaizo amyvu nyi zhiwo ma sutggan shinggan zui ring lo qo ma wum-o bigvat toq ra ga.

Haunyi le zuppong mai “Zhe ge amu zui byu”eq “Zhe ge pung byu”rire qeon agvo; nambat 6 cik Zaizo amyvu e laili byinpye pung mi bipye bidvu ra byu eq arong bo pungbyu ri qin zhi dvo begvo.

Mau myitpom byinpye wap zhaunoq mugon zau, Mau Zaizo amyvu byinpye pung seng-ang zhvungzui zau, ginwang seng-ang suwun ri zuppong mi lo zhe dvunshit agvo. (Qanglu gvasu Konglum)

(Puqsu Doqshi Labau)