wap ma lusik 2023 zan Zhunggo eq Myenming Ruili--Muje maujvo lai dap e dinnyong nyong qing lvum zuppong ma bolom e byu 7600 yuq myit bo ra.

Lvomo 12 qap 31 nyi nayi 9 qing ri, 2023 zan Zhunggo eq Myenming Ruili-- Muje mingdan maujvo lai dap e dingnyong nyong qing lvum zuppong gi, qing lvum myi-um bik gvat eq din qing lvum begvo.

Mingdan kau eq gaming gamau mai lo zhe bolom e qing lvum byu 7600 yuq myit bang, Ruili lang yam mai 2024 zan ma chom din wang lvum agvo.

Myenming mai Kunmyin ma muban wap le cuq dvo e muban wap wap-up Wudvoda-ang, Yunnan ming gungbvan mugon wap 2 zvang Xunshiyen Lyauwui, mauzvang nvikbo Li Zhenhon,Zhen Hungyun、Maushau,Xelin、Lichon bve qing lvum myi-um bik myving agvo.

Xidam dinnyong nyong qing lvum e qo hingpyang 42.195 deng,ladvum za gvut din qing lvum e gi 21.0975 deng、nguingon din qing lvum e gi 7.5 deng、agon din byvaq gvun e bve 4 lvum gvut gamkoq mu din qing lvum agvo. Hingpyang 42.195 deng gvut din qing lvum e qokat gi, Ruili zongsam bo e gai qo eq lam gvun zhowo ma gvut dvo agvo, zang din lai e jo gi Byinjangfunghong qomo, myuqkau gungbvan ban qam, Nongmo nvong yam, “Lawa kau 2 mingdan”, Hamsha zhowo mai din lai lui, tangtang ma gi dvoq din zhowo Sam amyvu myuqcau ma dum din dvau lo agvo. Din qing lvum bang“Lawa kau 2 mingdan”、“Wuilang lalang 2 mingdan”zongsam bve bo e mili isam ri myang wu gvun lo e mai lai lui, nvikdvang zhvitmyit bo e maujvo mingli ri re myang wu gvun begvo.

Din qing lvum e qolat ma, mingbyu wui le wu yap yan bum mu, qing lvum bang ri wum-o zhaq le byi agvo. Zhunggo eq Myenming 2 mingdan mai zhe le lo e wum-o byi bang 38 yuq gi, din qing lvum bang ri mikon zat go byvaq e dong mai wum-o le byi agvo. Hauzhang din qing lvum bang gi, Zhunggo eq Myenming 2 mingdan mingbyu wui eq chom byi e zumngon wum-o zhaq myang yu begvo.

Myigon wu ri, 2016 zan mai Ruili din nyong nyong qing lvum mu pong zui lo e 7 zan xi gu ma, bolom e mingdan eq zhowo 33 wo, byudu 53 mun yuq zhe be, xi ma Zhunggo din qing lvum muzum wap mai byi e ngunlong yu qing lvum muzo、Zhunggoq gungbvan bvan lam qing lvum muzo ga e arong mying myang yu wu be. Zongsam bo e qing lvum muzo xi mai, mingdan kangmo ma e qing lvum muzo bo lom nau bang ri, ming- gvan zongsam bo e qing lvum jamzan zvam dvo byi be ga. (Puqsu Langdving)