Sikung mau 16 cik 4 da mingbyu gungtai zuppong xiqap 19 nyi napjvo Mangshi ma ong za wo pong dvom gvat begvo, maugom ginwang myuq kangmo, zhiwo kangmo, muzo kangmo mai zupzing lo mu, mingbyu gungtai zuppong lo bo zhe lom e gungtai bve yuqzhup mo imyit gungdu myoqnvo isam congcong zvangzvang za gvut, nganvung mau ngonding rapra sut gvung dvoq lo qo ma tunghui e yakkak muzo eq yakkak muzo kasu gvut peran e lo ra dangshi dangshop zhaq lo daitoq agvo.

Gungtai Chen Chunxau ga ri, jiro zvang zhongzo bve eq dviqzvang zhongzo bve imyit wangzan gvo ra midvu eq mira shut mu agvut toq gvo ra midvu, ganzvang myvang mai zhvungzhvuq lago yu lui mvoqjving yu ra dut ra. Zvang kangmo Dang wapdoq, asuya mai mvoqshit muzui rungwap sai lvoq kik, mvoqshit muzui byu sai lvoq myo, ngunwum zewum sai tuqbang byi gvut, zhongmvoq mu zui ringzhat qo wum-o rau sai gvat ra dut ra. Zhiwo kangmo zhong ri midung gvut chomlom mu, yvumtu mai, sheqi mai, womu wunzui rungwap bang mai loqcoq chang coq gvut, gvo lo soq zoshang wui ri mvoqjving yu ra jamzan chin dvo byi shang ga.

Gungtai Xi Leqhung ga ri, zuisai muzo ma chomlom mu, sutngun zhe wo wang lvuq e zhvoiyung nyi ngon yvummau wo sai rvang dvo ra midvu, gomau gvunzhang toq wun bang ri yvummau qo rau dvau lo nvang mu, zhvoiyung yvummau lo shui rvang gvo qo soqhang wumtuq byi ra dut ra. Akun zhang sheq, yvummau ma yvumzung mangzo bau nyviwui yakkak dvo qo bve yvoyvo mai lawo yom lo ra ngvut le. Mingbyu mugon rungwap mai hi-u shui she, go rungwap bang bve ri bo dve zui gvut, abvung awang mai yvang yvummau wakau ma mangzo kubau byu anyi, zoshang shui gvo byu eq mvoqjving byu abo mu e yakkak mu peran byvam ra midvu, mangzo zoshang gon ge mvoq ge qo amaq kam ge byi shang ga.

Gungtai Yang Rungfan ga ri, Caugo、Yuqcha、sikgam wang ma ho e mvanhaq chi bve gi nganvung mau “Wuijeng bumnyui gi hingbum ngunbum be” ga e mu zhe ge shoq wo zuisai e lo qo ngvut le. Asu e akui gi, sikgam wang ma ho e ngun dut ze shau mu, wo ho toq e mvanhaq chi ri zhaq shau ra. Asuya mai Sikung mau sikgam wang ma ho e sutmu zhe wo zui ringzhat ra midvu, xiqo ma e muzo zhizo lago samlik wu mu, lazan ma lazan sutgan mu gvedvu zui qo pyai toq lo kun, sikgam wang sutgan mu zuiring qo ma chung ang e ngunze tuq lvuq byi mu, bummau yozui mingbyu wui sutngun myo myo wo ho wang yu ra su gvut byi shang ga dai ra.

Gungtai Shang Laqbyen ga ri, Mingmau mauyam sutmu zuiring qamkau cuq e mai, zvang kangmo rungwap kangmo bve girum lom zang be, qamkau maumyi tuk byi, ngunze tuk byi hairi wo gvut zhe byi be, asu e wumgun ogun e yakmu eq qamkau ringzhat qo lvoq nvung e bo ra. Mau wapdoq asuya mai wumgun ogun e yakmu lago byvin ge, a ngvut zhang qamkau ma e wumgun ze ri godvu gvut byvam mu, Mingmau yvang ma Sikung mau wumgun mu zhep wu rung cuq dvo mai, maugom chirung kangmo ma wum agun e 3 shut mai zhep wu sai dvo byi gvut, Mingmau sutmu dum wo ringzhat lo shoq chom tuqbang shang ga.

Gungtai Yang Lin-yen ga ri, zvang kangmo rungwap kangmo eq shingra qo kangmo mai myiwe zoshang ri lago chom gvut ra dut ra, diqa gi zoshang wui wangzan yuqyo za gvut gvo lo qo ma, lago yvang chom migum ge ra dut ra. Gvo lo soq zoshang wui mira lvoq shut haimu ra fanggam, zoshang ri rvoi e mira mu hai toq ra fanggam, zoshang wui gungdu imyit wangzan qo langjvo e zhungzhung mu toq ra bve lago yvang fanggam ge ra dut ra. Seng-ang e rungwap bang eq zhong bve, yvum bve mai lago chom bvong gon lui, gvo lo soq zoshang wui ri zhongkau zhongdoq ngon nvang e mai lailui, sup ngon gvun nvang le gvut ra dut ra ga.

Gungtai Gaumui ga ri, yozui mingbyu wui hi sut zhe myo wang qo zuqzuq chang lui, dumwa sutgan mu chom zuisai shiwa moqpung gvokik lo qo tuqbang wum-o sai gvat tuq lvuq byi ra dut ra. Yvummau chom bvong ringzhat dvoq lo, mauyam nyi ngon dumwa, gunzhvung mai girum zhiwo, Shanghai eq Yunnan ming chom bvong zui mu bve ma e girum ngun yu toq byi lui, maumyi zhiwo ri re wu mu, wakau muzo eq ang e ringzhat yung yu toq nvang, yvummau gvunggat byumoq ri sai cuq gvo, wumcong ocong e tungzam ri cuq kum dvo gvut, dumwa zvang sutgan mu zui ringzhat yungsik rau yu toq dvo byi ra dut ra ga.