(Hida le atang ximai wucoq aq)

(2) Xibyvat sutmu pungzhvung saitoq. Sutgan ringzhat qo gi zhoqze sutgan mu ma wum myo gvat, zhakmu sik loqzo zui so, zesai gvung, zejai gvung, maudang gvung, qolvai gvung, datbyvung gvung, ngvapcham zhimu gvung e mingdan lawan saitoq. Sutmu zuisai bvunwang dumsai chungking eq gvokik e zhimu chungking sai byvong chung, zhvung, reng, diqa chungking sai e sutho mu ringzhat qo tuqbang, zesai ganzvang myvang qo, zen gat qo, mili binghung qo zhvundvui ringzhat e lo. Zhejai sutmu hi-u she qo lvoqging nyi, shutshai yui alvoqtoq gvut ringzhat qo eq seng e mili gvut azhe qo rau qom gvut zhe, zuisai nyan cangpun zewang tuq byi amaq kam wum-o lvoqdvoq. zuisai nyan sutmu sik qom bvong ringzhat qo zhvundvui, qanglu zhimu, byuwum zen gat, yuqdui zhimu,   zewang sik, ze-ngau sik, ganmyvang chung king, mili binghung qo bve asik mu qom saitoq. Ganzvang myvang e wunwaq pung zhvung sik saitoq lui, xibyvat wunwaq mu ri zhe jai e chungking saitoq mu, akui zvin  yomu eq nik mai bvong zui qo zhvundvui e lo. Ze ung datbyvung lawan coq sai, wuiloq ze ung ngon de ngon e qo rotyang tong dvo byi, ze dvede pau lvoq yom byi. Soncham sutgan lawan ringzhat mu, soncham sutgan eq zhoqze sutgan nik mai lvoqbvong e lo, minggvan ma qinglvum wum bo e soncham sutgan moqpung chom pung toq. Bvunnve zeking pyai rva, zvumking rangrva, ajvu eq kingzhvum lvoqreng, zvin-gan zham e bvunnve zeking pungzhvung zvuq zuitoq.

(3) Yvummau ringdvoq lo mu qom zuiso. Pongshingra yung yu e byvatqit zham mingdan gvut mu lvunglvang qom zuisai e lo qo ma, zheyak zhelai e womu gi yvummau zhoq dvo le. Yomu mau zhe hi ringzhat qo shirang, myuqkau eq yvummau lanong za bvong ringzhat qo shirang, myuqkau eq yvummau ma o ra ze hairi rot lvum nvang. Yomu gvung mingdan gvut mu lawan zuisai, yvummau sutze, gvungbyu, laili, zhoqnyi zong, shuipung ringdvoq lo qo lago zhvun dvui e lo. Guqzo hai ara ra midvu tungtang mai tuqzing, guqzo hai ara qo Dangpung eq suya wunwo lazhung za chom wun, 18 dvung mu e zuizo yo gingging zunggon dvo, bvunnve yotung banshoq ganzvang myvang e yotung gvut qom sai ge yu, guqmyi ho ring mu nik mai zuiwang lo, yomu zhimu eq zhakking chungzham qo tuqbang, guq ho e yozui mingbyu hi gewang amaq kam byi tunglai eq guqzo myo hotoq zhiwo bang ri ngunze dvaplvuq byi tunglai cuqkum gvut, Zhunggo byu e zangkoq gi Zhunggo byu yvumsing loq ma gingging waqzing dvo ra le. Guqzo myomyo hotoq imyit bo, zhakking yomu zui ringzhat, azhung zhung e zoze tuqbyi rung cuqsai. Yvummau diqa sutmu zui ringzhat, yozui mingbyu wui hi sut myo wang qo lvoqlam byi. Myung bang ri girum dvoq yu e ongshi lvoqging lvoqlam, myung muqjvup qut byvam be zhiwo eq mingbyu wui ri yvumsing nyiwo yvang ma zui ringzhat wum-o lvoqtan byi. Yvummau bvuntuq kingze eq shiwa wunwaq mu qom pyairva mu, nyi ngon zui ngon e zhvoiyung yvummau saitoq lo. Yomu mau gonzui tunglai sai   lvoqging lvoqreng, shiwa sutgan musik zui ringzhat, yozui sutmu singgon musik eq shiwa wunwaq mu zui ringzhat, yomu ganzong gejvo gvedvu zui. Yozui mau maumyi tunglai nik mai kuqlai, yozui mingbyu wui ri sutgan ajvu myo byi. Myuqkau wang be yozui byu e maumyi ajvu migum byi, maumyi sing ako ung nau bang ri soqhang wumtuq byi. Yomu ri tuqbang migum tunglai cuqkum dvo, yomu mau ngunze wugon rung cuqngap dvo ra le.               （Ban be）(Puqsu Mopyi)