Wap ma lusik Lvomo 4 qap 18 nyi ri, Yunnan dvanmo zhong bang   Sikung ma amu lo kat cho wu lui Mangshi ma zungzo zuppong ri pong agvo.

Sikung mau wapdoq zhvungzui suwun pung nvikbo, mau up mudve zau Lin Ji zuppong le bilom lui mau wapdoq mau asuya ma e gungtai gvut mu 2 tang bang amu coqzui lvum e ri le gvungdvon, Yunnan dvanmo zhong bang xi myvang zan yvang Sikung ri wum-o byi lo gvo e ri ajvu bun ra. Yvang gi 2 tang bang nik mai sai coqzui lvum, banshoq bang chom shigut lui Sikung ganzvang myvang e muzo zuisai qo eq ganzvang myvang e zhongpong muzo ma ajvu gvattoq ra ri lumzhing le ga.

Zuppong ma, zuppong zhe bilom e nvikbo wui eq loqsang sira bve paqzhvi chom mingtoq jvo lvum agvo, Mau she kelen eq Yunnan dvanmo zhong myinshexoqyen bang amu coqzui mike laigva chom gva lvum agvo, Yunnan dvanmo zhong myinshexoqyen zhong upzau He Myin sira mo gi, Mangshi Naqmu wapung eq Ruili myuq sutho zhiwo bang ri myinglong tuk byi ra.

Mike laigva ma gvalvum dvo e qo chang lui Mau shekelen eq Yunnan dvanmo zhong myinshexoqyen bang, Sikung mau wapdoq mau asuya ma e  muzhvung qo chang lui zuisai e lo ra ngvut le, Yunnan dvanmo zhong bang myincuxoq, shehuixoq mvoqbvan e gewang eq bvong mu amyvu laili muzo, maujvo sutgan muzo, sutho zhiwo sutgan muzo, maujvo gonkang muzo, gvunggat byu mvoqbvan toq qo bve samlik zui gvut coqzui e lo ra ngvut le, samlik toq e ongshi ri wum-o lvik gvut yu, ge chung e gvunggat byu mvoqbvan toq gvut Sikung sutgan muzo ganzvang myvang mai zuisai e lo qo ma wum-o sik zhat lvuq byi ra ngvut le ga.

(Puqsu Mangshang Langdving)