Suntung gi Zaizo amyvu goidvu zhe dat gai ngvam zo e zangsun lazhvau ngvut le. Zaizo amyvu wui “Tungcum a mying ri, zangzo a ngvam” ga dai e dang lakun zhoq le. Suntung gi gege yvang Zaizo amyvu zangbo toq ma age shau e sunngvam lazhvau yvang be. Zaizo amyvu byvatlo sumshi tung zo lo e suntung, minggvan zangsun zo ngvam gvun qo mai dai zhang, su myvu o eq ri aqum mu, o lvang zhaq le bo zo ngvam agvo.

Zaizo amyvu wui suntung tung zo lo e abvun awang gi, mangzo wui nvut ma zui abo dut byuq zhang, sunngvam awo bo nve zo dut e mizho, mo ri dat pau e Zaizo nvikdvang wui gi sho arvang nuqnuq tung nvuq mu, mangzo ri byi zo dat gvut hi lo gvo e ga. Hau mu lui, suntung ri gi “Mopau sun” ga mangzo ri pau e zangsun mying lvang dap ra.

Zaizo amyvu suntung tung zo e tungji eq tungcum gi yoso sikbvung mai tuq pyit lo e sikloq eq wamyit gomtung ri gvut le, myuqkau ka nyi bang lawam gi luqgok tungji eq tungcum, a ngvut zhang shamdvoq tungji eq tungcum chung e ri bo agvo.

Suntung ge tung zo e sunmyvu myo dik le, azhum ri ge tung zo, nyvoq gu e ri ge tung zo. Nyoq gu e suntung myo mo gi no shojvuq, chochi shojvuq, ngvoq shojvuq eq ngozo shojvuq bve myiqom ma nyvin nyvoq, a ngvut zhang byobyu ma dun um mu batput gvo     byvam mai, izhum, chang, shipyik, hubvun, pijvi, piro bve gvat mu tung zo le. Haumai   advan dvan e myik, kanzhui zhuimo eq zhui zvai, nuqjvui, kilvam, gvidviq, mauchi bve ri zhvoq nyvoq, gvang nyvoq, put nyvoq mu izhum shipyik, zolyau pijvi ngam ngam gvat lui tung zo le.

Azhum ge tung zo e sunmyvu myo       pyang gi mvanhaq dvungyvang ashi amyit bve ngvut le, sunqam mai a ngvut zhang yoso mai cikku lo sunzhum shang chizhvoi mu, izhum, shipyik, nuqbvup, chang, shingdvon, shingrvum, paihom, pijvi, piro bve qin gai gvat mu tung zo le. Danggve, bumchang tung, danchang tung, dvumo tung, jvuihing tung, hubvun tung, bum shibyvi tung, dvingjeq tung bve, azhum ge zo e sun hairi ge tung zo le. Se ra dut le gi, aqum e sun ma gai gvat e zolyau ri aqum, kazhung sun ma kazhung     zolyau gvat ri ngvam e gi zanggai su se ra le. Suntung ma ara e zolyau gvat zhang, tungtoq lo e sunzo ri a ngvam. Zolyau dat qin gvat e zanggai inu sheq, zangzo ishuq qungjo yum e sunzo dvakpyik dvakpyik za ga ladat tung toq lo le.

Dum ngvut zhang, suntung tung zo e mvanhaq dvungyvang shicham shimyit gi gungman chi dut le mu, anum shocu sunmo shau zo, suntung zo dvekdvek za tung zo man gvut nyi zhang, byu e gungdu zhe dat wangzan le. Suntung kasu tungzo ra? Suntung ka zhung tungzo ri zolyau kabve qin gvat ra? Ga zhang, a-o ma shojvuq tungzo yung hi yu wu shang:

1. Shojvuq tung.

Shojvuq tung ma gvat e zolyau gi: No shojvuq 200 keq ma, myen pijvi 20 keq, shipyik 10 keq, paihom 5 keq, izhum 1 keq, wuijing 0.5 keq gvat le. Sanghi ma myen pijvi, shipyik, paihom hi shang chi zhvoi mu, nunu za gvut hum ge dvo mai, myiqom ma nyvin nyvoq dvo e shojvuq azhap zhap zo gvut langcheq hen ge dvo. Hairi ban ngap be ga zhang, hum ge dvo e myen pijvi, shipyik, paihom hi tungcum ma shum gvat, izhum, wuijing ri laha gvat mu nuqnuq tungnvuq e mai, langcheq ge dvo e shojvuq eq dum lap nyvo mu, poqhaq panzo ma pya-pya za gvat dvam dvo lui, layuq lanvut chom nyvam zo zhang ngvam dik le.

2. Hubvun tung.

Hunbvun tung ma gvat e zolyau gi: Hu bvun 200 keq ma, shojvuq 100 keq, chang 10 keq, piro 5 keq, paihom 5 keq, myen      pijvi 20 keq, shipyik 7 keq, shingdvon 5 keq, izhum 2 keq, wuijing 0.5 gvat le. Sanghi ma hubvun shangchi zvan byvam mai advot zo zo gvut humpyit dvo, chang eq piro ri cheq humnvuq dvo, paihom, myen pijvi, shipyik,     shingdvon ri chizvan humnvuq dvo, haumai myiqom ma nyvin nyvoq dvo e shojvuq azhap zhap zo gvut batnvuq cikcheq dvo. Hairi ban hen ge dvo mai, shipyik, piro, chang hi nuqnuq tungnvuq, haumai hubvun, paihom, Myen yensui, shingdvon, izhum, wuijing dum gvat, zhe tang ma shojvuq dum nyvo mu,    poqhaq panzo mai gvat dvam zo zhang, ngvam dik be. Hubvun tungzo zhang se ra dut le gi, hubvun yvang ri lazvui pyikwat le mu shipyik, chang eq piro lazvui shau gvat ra le.                                             (Yang Yohan)